ডিজিটেল সংবাদ, ৰহমৰীয়াঃ শাসনাধিষ্ঠ চৰকাৰখনে স্বাস্হ্য খণ্ডৰ আমূল পৰিৱৰ্তনৰ জয়গান গাই থকাৰ সময়তে এটা গ্ৰামাঞ্চলৰ স্বাস্থ্য খণ্ডৰ ফোপোলা স্বৰূপ উদঙাই দিছে ৷ ৰহমৰীয়া স্বাস্হ্য কেন্দ্ৰৰ ভিতৰচৰাৰ পৰিৱেশে উদঙাই দিছ ৰাজ্যৰ স্বাস্থ্য খণ্ডৰ অৱস্থা ৷
প্ৰায় ১৭ দিনৰ পৰাই চিকিৎসক বিহীন হৈ আছে চিকিৎসালয় খন ৷ তিনিজন চিকিৎসকৰ কক্ষৰ চকী খালী হৈ পৰি আছে চিকিৎসালয়খনত ৷ যাৰ ফলত এজন মাত্ৰ ফাৰ্মাচীষ্ট আৰু এগৰাকী নাৰ্চেই চলাব লগীয়া হৈছে চিকিৎসালয় খনৰ কাম-কাজ ৷ প্ৰায় ৪০ খন ৰাজহ গাওঁ আৰু ৬ খন চাহবাগিছাৰ প্ৰায় ৬০ হাজাৰ সাধাৰন খাটি খোৱা লোকৰ একমাত্ৰ ভৰসাৰ স্থল এই চিকিৎসালয়খন৷
চিকিৎসালয়খনৰ একমাত্ৰ এম্বুলেন্সখনো এখন হাবিয়নিত জহি খহি পৰিত্যক্ত অৱস্থাত পৰি আছে ৷ চিকিৎসালয় খনৰ এনে দুৰৱস্থাই এতিয়া বৃহত্তৰ ৰহমৰীয়া অঞ্চলৰ সৰ্বসাধাৰণ ৰোগীসকলৰ মাজত হাহাকাৰ পৰিৱেশৰ সৃষ্টি হৈছে ৷ চিকিৎসালয় খনৰ এনে কাণ্ডই সচেতন নাগৰিকক চিন্তিত কৰি তুলিছে ৷