ডিজিটেল সংবাদ বিহালীঃ অসম চৰকাৰ আৰু অসম চৰকাৰৰ বিয়াগোম বন বিভাগৰ চূড়ান্ত দায়ত্বহীনতা ,নিৰ্লিপ্তিতা আৰু অকৰ্মন্যতাৰ ফলত চুবুৰীয়া অৰুণাচলীয়ে এফালৰ পৰা দখল কৰিছে অসম আৰু অসমীয়াৰ ভূমি৷ মূলতঃ অসম চৰকাৰৰ বিয়াগোম বন বিভাগৰ বৰমূৰীয়াৰ অৱজ্ঞা, হেমাহীৰ বাবেই উত্তৰ অসমৰ বৃহৎ ভূমিখণ্ড গ'ল অৰুণাচলীৰ হাতলৈ৷
পিছে ইমানৰ পিছতো অসমৰ ভূমি বেদখল বিষয়টোত ৰাজ্য চৰকাৰৰ কোনো গুৰুত্ব নাই৷ আনহাতে অৰুণাচল চৰকাৰৰ পৃষ্ঠপোষকতাত অৰুণাচলীয়ে এখোজ-দুখোজ কৰি উত্তৰ অসমৰ উত্তৰাঞ্চলাৰ অধা ভূমি এলেকা নিজৰ দখললৈ নিছে৷
গুৰুত্বপূৰ্ণ যে যিসয়মত মুখ্যমন্ত্ৰী ড° হিমন্তবিশ্ব শৰ্মাৰ নেতৃত্বত অসম-অৰুণাচল সীমান্তৰ আন্তঃৰাজ্যিক সীমা সমস্যা সমাধানৰ আঁচনি হাতত লৈছে সেই সময়তে পূৱ শোণিতপুৰ বন সংমণ্ডল অধীনৰ বিশ্বনাথৰ অসম- অৰুণাচল সীমান্তৱৰ্তী এলেকাৰ ২ নং চুডেনচিৰি এলেকাত অৰুণাচলীয়ে অসমৰ মাটি দখল কৰি বাসগৃহ সাজিৱলৈ অহাক লৈ সীমান্তত এক উত্তেজনাময় পৰিৱেশ সৃষ্টি হয়।
জানিব পৰা মতে আজি বিয়লি অসম-অৰুণাচল সীমান্ত এলেকা নমৰাৰ উত্তৰে অৱস্থিত ২ নং চূডেনচিৰিৰ এক বৃহৎ ভূমি এলেকাক একাংশ চুবুৰীয়া অৰুণাচলী লোক অঞ্চলটোত ঘৰ সজাৰ লক্ষ্যৰে উপস্থিত হৈ বন-জংঘল চাফা কৰিছিল৷ অৰুণাচলী লোকে বন জংঘল কাটি ঘৰ সাজিৱলৈ প্ৰস্তুতি চলোৱা কাৰ্যত সীমান্তবাসীৰ চকুত পৰাত অৰুণাচলীৰ বেদখল বিৰুদ্ধে জাঙুৰ খাই উঠে৷
সিপিনে অসমৰ ভূমিত অৰুণাচলীয়ে বাধাহীনভাৱে ঘৰ সাজিৱলৈ চলোৱা কাৰ্যত সীমান্তবাসী অসমীয়াই বাধা আৰোপ কৰাত অৰুণাচলীলোক খৰ্গহস্ত হৈ পৰে৷ ফলত ক্ষণিকতে অৰুণাচলী লোকে ভৰি পৰে সীমান্ত এলেকা৷ সমান্তৰালভাৱে অসম-অৰুণাচল সীমান্তত অসমীয়াৰে অৰুণাচলীৰ সংঘাত উত্তেজনাপূৰ্ণ হোৱাৰ খবৰ বিশ্বনাথ প্ৰাশাসনে লাভ কৰাৰ লগে-লগে বিশ্বনাথ প্ৰশাসন তৎপৰ হৈ পৰে৷
সীমান্তবাসীৰ খবৰৰ ভিত্তিত বিশ্বনাথ আৰক্ষী প্ৰশাসনৰ উচ্চপদস্ত বিষয়াবৰ্গ ঘটনাস্থলীত উপস্থিত হয়৷ বিপৰীতে সীমান্তৰ ঘটনাস্থলীত অৰুণাচলৰ পাকেকিচাং জিলাৰ আৰক্ষী-প্ৰশাসনৰ যন্ত্ৰৰ উচ্চ পদস্থলোকো উপস্থিত হয়৷ তথ্যমতে বিশ্বনাথ জিলা আৰু পাকেৰিচাং জিলা প্ৰশাসনৰ বিষয়াবৰ্গ,আৰক্ষী বিষয়াৰ উপস্থিতিত হৈ পৰিৱেশ নিয়ন্ত্ৰণ কৰিবলৈ সক্ষম হয়৷
জানিব পৰামতে বিশ্বনাথৰ অতিৰিক্ত আৰক্ষী অধীক্ষক, পূৱ শোণিতপুৰৰ ডি এফ অ', বিশ্বনাথ ৰাজহ চক্ৰ বিষয়া আৰু আবছুৰ আঞ্চলিক সভাপতি মণিৰাম বসুমতাৰী ঘটনাস্থলীত উপস্থিত হৈছিল৷