ডিজিটেল সংবাদ কোকৰাঝাৰঃ বডোলেণ্ড বিশ্ববিদ্যালয়ৰ উপাচাৰ্য লাইশ্ৰাম লাডু সিঙক অপসাৰণ কৰিবলৈ এবছুৱে তীব্ৰ আন্দোলন কৰাৰ পিছত আজি বিষয়টোক লৈ তীব্ৰ প্ৰতিক্ৰিয়া প্ৰকাশ কৰিছে মুখ্যমন্ত্ৰী ড° হিমন্ত বিশ্ব শৰ্মাই ।
কোকৰাঝাৰত সাংবাদিকৰ এক প্ৰশ্নোত্তোৰত প্ৰতিক্ৰিয়া প্ৰকাশ কৰি ড° হিমন্ত বিশ্ব শৰ্মাই কয় যে, বডোলেণ্ড বিশ্ববিদ্যালয়ৰ বৰ্তমানৰ উপাচাৰ্যৰ হাতত বিশ্ববিদ্যালয়খনৰ পৰিবেশ বহু বেয়া হৈছে ৷ উপাচাৰ্যৰ কাম কাজত মইয়ো সন্তুষ্ট নহয় ৷ তেওঁক মই পৰামৰ্শ দিছো পদত্যাগ কৰি গুছি যাওঁক ৷ শিক্ষামন্ত্ৰীয়েও তেওঁক কৈছে পদত্যাগ কৰিব লাগে ৷ কিন্তু উপাচাৰ্য জন আকোঁৰগোজ ৷ অলপো সন্মান থকা মানুহ হ'লে উপাচাৰ্যজনে পদত্যাগ কৰি গুছি গ'লহেতেন বুলি মন্তব্য কৰিছে মুখ্যমন্ত্ৰী ড° হিমন্ত বিশ্ব শৰ্মাই ।
লগতে তেওঁ কয় যে, উপাচাৰ্যজনক ছাত্ৰ-ছাত্ৰীয়ে ভাল নাপায়৷ আনকি ৰাইজেও তেওঁক ভাল নাপায়৷ ইমানৰো পিছতো তেওঁহে জানে কিহৰ কাৰণে আছে ৷ ইপিনে আইনৰ গণ্ডীৰ মাজেৰে বডোলেণ্ড বিশ্ববিদ্যালয়ৰ উপচাৰ্যজনক কি ধৰণে বিদায় দিব পৰা যায় সেই বিষয়ে চাই থকা হৈছে বুলি সদৰি কৰিছে মুখ্যমন্ত্ৰী ড° হিমন্ত বিশ্ব শৰ্মাই ৷