ডিজিটেল সংবাদ ধেমাজিঃ ৰাজ্যৰ শিক্ষা বিভাগে অনুষ্ঠিত কৰা গুণোৎসৱত পাঁচখন শীৰ্ষ বিদ্যালয় তালিকাত নাম সন্নিবিষ্ট হোৱা বৰদৈবাম চাহ মজদুৰ জনজাতি মধ্য ইংৰাজী বিদ্যালয় উন্নীত হ’ব চাহ বাগিছা আদৰ্শ বিদ্যালয়লৈ৷ বুধবাৰে এই ঘোষণা কৰে শিক্ষামন্ত্ৰী ডাঃ ৰনোজ পেগুৱে ৷
বুধবাৰে বিধায়ক পুঁজিৰে নিৰ্মাণ কৰা বিদ্যালয়খনৰ নতুন শ্ৰেণী কোঠা উদ্বোধন কৰি এই ঘোষণা কৰে শিক্ষামন্ত্ৰীগৰাকীয়ে। ১৯৮৪ চনতে প্ৰতিষ্ঠা হোৱা এই বিদ্যালয়খনৰ চাহ বাগিছাৰ ছাত্ৰ-ছাত্ৰীসকলে বহু অভাৱ অভিযোগৰ মাজৰে শিক্ষাগ্ৰহণ কৰি আহিছিল।
এনে অভাৱ-অভিযোগৰ মাজতে বিদ্যালয়খনে আজি লাভ কৰিলে দুটাকৈ ডিজিটেল শ্ৰেণী কোঠা ৷ এই দুয়োটা ডিজিটেল শ্ৰেণী কোঠা উদ্বোধন কৰি শিক্ষামন্ত্ৰীগৰাকীয়ে কয়, আগন্তুক বৰ্ষৰ পৰাই এই বিদ্যালয়খনক এখন চাহ বাগিছাৰ আদৰ্শ বিদ্যালয়লৈ উন্নীত কৰা হ'ব। ইয়াৰ ফলত ভিতৰুৱা অঞ্চলটোৰ ছাত্ৰ-ছাত্ৰী সকল যথেষ্ট লাভান্বিত হ'ব বুলিও তেওঁ আশা প্ৰকাশ কৰে ৷
বিদ্যালয়খনত শিক্ষামন্ত্ৰী গৰাকীয়ে উপস্থিত হৈ কৰা এই ঘোষণাৰ পিছতেই উৎফুল্লিত হৈ পৰিছে বিদ্যালয়খনৰ কৰ্তৃপক্ষ আৰু ছাত্ৰ- ছাত্ৰীসকলে ৷