ডিজিটেল সংবাদ কাজিৰঙাঃ নামনি সোৱনশিৰি জলবিদ্যুৎ প্ৰকল্পত সংঘটিত অঘটনৰ পাছত প্ৰকল্পটোৰ বিৰুদ্ধে পুনৰ সৰৱ হৈ পৰিছে ৰাইজৰ দলৰ সভাপতি অখিল গগৈ ৷ অখিল গগৈৰ মন্তব্য যে, এই অঘটনৰ পাছত নিৰ্মান কাৰ্য আৰু দুবছৰ পিছুৱাই যাব ৷
জলবিদ্যুৎ প্ৰকল্পটো নিৰ্মানৰ ক্ষেত্ৰত আৰম্ভণিতে গুৱাহাটী, ডিব্ৰুগড় বিশ্ববিদ্যালয়ৰ লগতে আই আই টি গুৱাহাটীয়ে তথ্য প্ৰদান কৰি ইয়াৰ বিৰোধিতা কৰিছিল ৷ যুক্তি প্ৰদান কৰিছিল যে বালি, শিল তথা মৰা শিলৰ ওপৰত জলবিদ্যুৎ প্ৰকল্প নিৰ্মাণ কাৰ্য সম্ভৱ নহয় ৷ যাৰ পৰিণতিত নিৰ্মাণ কাৰ্য চলি থকা সময়তে ইতিমধ্যে ১০ জন শ্ৰমিকৰ মৃত্যু হৈছে ৷
জলবিদ্যুৎ প্ৰকল্পটোৰ বিৰুদ্ধে কৃষক মুক্তি সংগ্ৰাম সমিতিৰ লগতে আন বহু সংগঠনে প্ৰতিবাদ সাব্যস্ত কৰি পাঁচবছৰ বন্ধ কৰি দিছিল নিৰ্মাণ কাৰ্য ৷ আনহাতে জলবিদ্যুত প্ৰকল্পটো এটা জলবোমা বুলি অভিহিত কৰি অখিল গগৈয়ে মন্তব্য কৰে যে নিৰ্মাণ সন্পূৰ্ণ হ’লে প্ৰায় পাঁচ লাখ মানুহৰ জীৱন জিৱিকা তথা জৈৱ বৈচিত্ৰতাৰ বাবে ভাবুকি কঢ়িয়াই আনিব ৷