ডিজিটেল সংবাদ কাজিৰঙাঃ যোৱা চাৰিটা দিনে জলমগ্ন হৈ থকা কাজিৰঙা ৰাষ্ট্ৰীয় উদ্যানৰ বান পৰিস্থিতি ক্ৰমাৎ স্বাভাৱিক অৱস্থালৈ আহিছে যদিও শংকা আঁতৰা নাই বন্যজীৱকুলৰ ৷ ৰাষ্ট্ৰীয় উদ্যানখনত ৪৫ টা বন শিৱিৰ এলেকা বৰ্তমানেও হৈ আছে জলমগ্ন ৷
ইয়াৰ ভিতৰত ১৮ টা বন শিবিৰ কহঁৰা বনাঞ্চলৰ ৷এতিয়াও ৪২ ৰ পৰা ৫০ শতাংশ জলমগ্ন হৈ আছে বিশ্ব ঐতিহ্যক্ষেত্ৰ কাজিৰঙা ৰাষ্ট্ৰীয় উদ্যান ৷ পূৱ অসম বন্যপ্ৰাণী সংমণ্ডল প্ৰাধিকাৰী অৰুণ ভিগনেচে প্ৰকাশ কৰা মতে বানৰ সময়ত অধিকাংশ বন্যজন্তু ৰাষ্ট্ৰীয় উদ্যানৰ হাইলেণ্ড সমূহত আশ্ৰয় লৈ আছে ৷
কিছু বন্যপ্ৰাণীয়ে ৩৭ নং ৰাষ্ট্ৰীয় পথৰ দুয়োকাষে অহা-যোৱা কৰি আছে। বন বিষয়া গৰাকীয়ে লগতে উল্লেখ কৰে যে, এটা ছাগলী পহু আৰু এডাল অজগৰ ৩৭ নং ৰাষ্ট্ৰীয় পথৰ ক্ৰমে বুঢ়াপাহাৰৰ আমগুৰি আৰু হালধিবাৰীত গাড়ীৰ খুন্দাত মৃত্যু হৈছে ৷
তদুপৰি এটা ম’হ আৰু এটা ছাগলী সাঁতুৰি অহা অৱস্থাত মৃত্যু হৈছে ৷ তদুপৰি বানৰ সময়ত যাতে চোৰাং চিকাৰীয়ে জীৱকুল হত্যা কৰিব নোৱাৰে তাৰ বাবে দিনে নিশাই কৰ্তব্যত নিয়োজিত কৰিছে বনকৰ্মীসকলক ৷ ইয়াৰোপৰি ৩৭ নং ৰাষ্ট্ৰীয় পথেৰে অহা যোৱা কৰা চালকসকলক নিয়ম মানি চলাৰ আহ্বান ডি এফ অ' গৰাকীৰ ৷