ডিজিটেল সংবাদ, হাওৰাঘাটঃ কাৰ্বি আংলং জিলাৰ বকলীয়াঘাট হালধীআটি গাঁৱৰ বিশিষ্ট কবি, সাহিত্যিক তথা শিক্ষয়িত্ৰী অনুপ্ৰভা হাজৰিকাৰ শনিবাৰে নিশা গুৱাহাটীৰ এখন চিকিৎসালয়ত ৪৭ বছৰ বয়সত অকাল মৃত্যু হয় । ‘এমুঠি জোনাক' নামৰ কাব্য গ্ৰন্থৰ স্ৰষ্টা অনুপ্ৰভাৰ মৃত্যুত শোকস্তব্ধ বকলীয়াঘাটৰ বিভিন্ন দল সংগঠন ৷
সদৌ অসম লেখিকা সমাৰোহ সমিতিৰ লগতে কাৰ্বি আংলং জিলা সমিতিৰো সহ সম্পাদিকা আছিল অনুপ্ৰভা হাজৰিকা ৷ বকলীয়াঘাট সাৰ্বজনীন বিহু সমিতিৰ স্মৃতিগ্ৰন্থ 'কেতেকী'ৰ সম্পাদিকা হোৱাৰ উপৰি ধৰ্ম অনুষ্ঠান শ্ৰীমন্ত শংকৰদেৱ সংঘ কাৰ্বি আংলং জিলা শাখাৰ 'নামামৃত'ৰ প্ৰাক্তন সম্পাদিকা আছিল অনুপ্ৰভা হাজৰিকা ৷
বোকাখাতৰ জনগোষ্ঠীয় সাংস্কৃতিক ঐক্য মঞ্চ অসমে বিগত বৰ্ষত তেওঁক প্ৰদান কৰিছিল 'কাব্য সৌৰভ‘ বঁটা ৷ বকলীয়াঘাটৰ বিভিন্ন অনুষ্ঠান প্ৰতিষ্ঠানৰে জড়িত আছিল সৰবৰহি মহিলা গৰাকী ৷
শোকস্তব্ধ বকলীয়াঘাটৰ অগ্ৰণী মহিলাসকলে তেওঁৰ মৃত্যুত গভীৰ শোক ব্যক্ত কৰি তেওঁৰ আত্মাৰ সদগতি কামনা কৰে ৷ মৃত্যুৰ সময়তঅনুপ্ৰভা হাজৰিকাই এটি কণমানি কন্যা সন্তান, স্বামীৰ লগতে পৰিয়ালক ইহ সংসাৰত এৰি থৈ যায় ৷