ডিজিটেল সংবাদ, জামুগুৰিহাটঃ জামুগুৰিহাটৰ উত্তৰাঞ্চলৰ কৃষক ৰাইজে নেমু খেতিৰে স্বাৱলম্বী হোৱাৰ প্ৰয়াস অব্যাহত ৰাখিছে যদিও বজাৰৰ অভাৱৰ লগতে উচিৎ মূল্য লাভৰ পৰা বঞ্চিত হৈ আহিছে কৃষক ৰাইজ৷ কিন্তু শেহতীয়াকৈ সদনৰ মজিয়াত কৃষিমন্ত্ৰী অতুল বৰাই কাজি নেমুক অসমৰ জাতীয় ফল হিচাপে স্বীকৃতি প্ৰদানৰ কথা ঘোষণা কৰাৰ পিছতে উৎফুল্লিত হৈ পৰিছে জামুগুৰিহাটৰ এইসকল কৃষক ৰাইজ ।
কাজি নেমুক জাতীয় ফল হিচাপে ঘোষণা কৰা কৃষিমন্ত্ৰী গৰাকীক ধন্যবাদ ও কৃতজ্ঞতা জ্ঞাপন কৰি কৃষক ৰাইজে এই নেমুৰ উপযুক্ত বজাৰ সৃষ্টি কৰি কৃষকক উচিৎ মূল্য প্ৰদানৰ ব্যৱস্থা কৰিবলৈকো দাবী জনাইছে ।
উল্লেখ যোগ্য যে জামুগুৰিহাটৰ উত্তৰ অঞ্চলৰ আজাৰগুৰি, বৰদিকৰাই, মৰিসুতি, বালিজুৰি আদিকে ধৰি বিভিন্ন ঠাইত প্ৰচুৰ পৰিমানে বিভিন্ন প্ৰজাতিৰ নেমু উৎপাদন কৰা হয় আৰু ইয়াৰ ভিতৰত গৰিষ্ঠ সংখ্যকেই কাজি নেমু৷ এই কাজি নেমুসমূহৰ ভিতৰত গুটি নাথাকে বুলি জনাইছে কৃষকে৷ আঞ্চলটোৰ বহু সংখ্যক কৃষক ৰাইজে দীৰ্ঘদিন ধৰি দুই , তিনি বিঘা কৈ মাটিৰ নেমু খেতিতেই আত্মনিয়োগ কৰি পৰিয়াল ভৰণ পোষন প্ৰচেষ্টা অব্যাহত ৰাখিছ যদিও বজাৰৰ অভাৱত উচিত মূল্যৰ পৰা বঞ্চিত হৈ আহিছে কৃষকসকল৷ চৰকাৰৰ কৃষি বিভাগে এই ক্ষেত্ৰত আৰু অধিক গুৰুত্ব প্ৰদান কৰি কাজি নেমুৰ এখন বৃহৎ বজাৰ সৃষ্টি কৰিব পাৰিলেহে কৃষক ৰাইজ নিশ্চিত ভাৱেই উপকৃত হ'ব বুলি ধাৰণা কৰিব পাৰি ।