ডিজিটেল সংবাদ, কাজিৰঙাঃ কাজিৰঙাৰ বন্যপ্ৰাণী উদ্ধাৰ আৰু পুনৰ সংস্থাপন কেন্দ্ৰ চমুকৈ চি ডব্লিউ আৰ চিৰ নতুন আলহি এটা দুবছৰীয়া হাতী পোৱালি ৷ কিছু দিনৰ পূৰ্বে ওদালগুৰিৰ বগাপানীত বন্যহস্তীৰ জাকৰ লগত অহা পোৱালিটো ঘটনা ক্ৰমে পৰি গৈছিল এটা খাৱৈত ৷
বন্যহস্তীৰ জাকটোৱে পোৱালিটোক উঠাবলৈ চেষ্টা কৰিও বিফল হোৱাত পোৱালিটো এৰি আঁতৰি গ’ল জাকটো ৷ আনহাতে দুৰ্গম এলেকা হোৱাৰ বাবে দুই চাৰি দিনৰ পাছতহে স্থানীয় লোকৰ দৃষ্টিগোচৰ হোৱাত খবৰ দিয়ে বন বিভাগক ।
পাছত কাজিৰঙাৰ পানবাৰী স্থিত চি ডব্লিউ আৰ চিৰ সহযোগত বন বিভাগে পোৱালিটো উদ্ধাৰ কৰি লৈ আহে কাজিৰঙালৈ ৷বৰ্তমান চি ডব্লিউ আৰ চিত পৰিচৰ্যা কৰি থকা হৈছে পোৱালিটোক ৷কেন্দ্ৰটোৰ চিকিৎসকৰ মতে প্ৰথমে দুদিন পোৱালিটোৱে আমনি কৰিছিল যদিও কেন্দ্ৰটোত থকা আন হাতীৰ সংস্পৰ্শলৈ অহাত বৰ্তমান সি শান্ত হৈছে ৷ এতিয়া আন হাতী সমূহৰ লগত সুন্দৰ ভাৱে চলাফুৰা কৰি আছে পোৱালিটোৱে ৷