ডিজিটেল সংবাদ, ধুবুৰী : মহাপুৰুষ শ্ৰীমন্ত শঙ্কৰদেৱ আৰু মাধৱদেৱৰ অনুপম সৃষ্টি খোল বাদন, সত্ৰীয়া নৃত্য আৰু বৰগীতৰ অমিয়া সুৰেৰে মুখৰিত হৈ পৰিছে ভাৰত-বাংলাদেশ সীমান্তৰ সত্ৰশালৰ ৰামৰায়কুটি সত্ৰ। এই সন্দৰ্ভত ৰামৰায়কুটি সত্ৰৰ লগত জড়িত হৈ থকা কোচবিহাৰৰ মধুপুৰ সত্ৰ সমিতিৰ প্ৰচাৰ সম্পাদক যুগান্ত বায়নে মত প্ৰকাশ কৰে।
তেওঁ কয় যে, যি সময়ত অসমৰ যুৱক-যুৱতীয়ে সত্ৰীয়া সংস্কৃতিকে ধৰি অসমৰ থলুৱা লোকসংস্কৃতিৰ অধ্যয়ন আৰু অনুশীলন কৰাৰ ক্ষেত্ৰত আগবাঢ়ি নোযোৱাৰ বাবে সময়ে সময়ে বিভিন্ন পৰ্যায়ত কেতবোৰ অভিযোগ উত্থাপন হৈ আহিছে; তেনে সময়তে অসমৰ সীমামূৰীয়া ভাৰত-বাংলাদেশ আন্তৰ্জাতিক সীমান্তৰ সত্ৰশালৰ ৰামৰায়কুটি সত্ৰত অঞ্চলটোৰ খিলঞ্জীয়া যুৱক-যুৱতীৰ লগতে এক বৃহৎ সংখ্যক বাংলা ভাষী যুৱক-যুৱতীয়ে এই প্ৰশিক্ষণ কৰ্মশালাত শিক্ষা গ্ৰহণ কৰি সত্ৰীয়া কৃষ্টি-সংস্কৃতিৰ বিশাল আৰু ৰসাল পথাৰখন আৰু অধিক বৰ্ণিল কৰি তুলিছে।
সামাজিক আৰু সাংস্কৃতিক উত্তৰণৰ ক্ষেত্ৰত অঞ্চলটোত অৰ্থনৈতিক বৈষম্যই সৃষ্টি কৰা অলেখ বাধা আৰু প্ৰতিবন্ধকতাক নেওচি ৭০ গৰাকী যুৱক-যুৱতীয়ে গুৰু দুজনাৰ অনুপম সৃষ্টিৰাজি সত্ৰীয়া নৃত্য আৰু বৰগীতৰ প্ৰশিক্ষণ গ্ৰহণ কৰে। অসমৰ বৰ্ণিল কৃষ্টি-সংস্কৃতিক আন্তৰ্জাতিক সীমান্ত অঞ্চলত প্ৰচাৰ আৰু প্ৰসাৰ কৰাৰ ক্ষেত্ৰত এক অনবৈদ্য অৱদান আগবঢ়োৱা নিৰলস প্ৰচেষ্টাত ব্ৰতী হৈছে যুৱক-যুৱতীসকল।
মধুপুৰ সত্ৰ সমিতিৰ সভাপতি তথা ৰামৰায়কুটি সত্ৰৰ সত্ৰাধিকাৰ জিতেন্দ্ৰ নাথ প্ৰধানীৰ তত্বাৱধানত যোৱা ৪ জুলাইৰ পৰা আৰম্ভ হোৱা উক্ত কৰ্মশালা ১৪ জুলাইত সমাপ্ত হ'ব। উল্লেখ্য যে, কৰ্মশালাত প্ৰশিক্ষণ প্ৰদান কৰিছে বিশিষ্ট সত্ৰীয়া শিল্পী অজয় বায়ন আৰু নুপূৰজ্যোতি মেধিয়ে।