ডিজিটেল সংবাদ শিৱসাগৰঃ অসম আন্দোলনৰ পৰা আৰম্ভ কৰি শৈক্ষিক আন্দোলনলৈকে, সংস্কৃতিৰ পৰা সমবায় আন্দোলনলৈকে অনেক সংগ্ৰামৰ লগত প্ৰত্যক্ষভাৱে জড়িত বিশিষ্ট সমাজকৰ্মী তথা অ’এন জি চিৰ অৱসৰপ্ৰাপ্ত উপ-অধীক্ষক ৰাজেন দত্তৰ স্মৃতিত এক শিৱসাগৰ সুন্দৰপুুুৰত আজি এখনি ৰাজহুৱা স্মৃতিচাৰণ সভা অনুষ্ঠিত কৰা হয় ৷ নতুন প্ৰজন্মক মানৱ সম্পদৰূপে গঢ়াৰ বাবে নিজা উদ্যোগত সুন্দৰপুৰ প্ৰাথমিক বিদ্যালয় স্থাপন কৰি বিনামূলীয়াকৈ ছাত্ৰ-ছাত্ৰীক পাঠদান কৰা ৰাজেন দত্তৰ স্মৃতিত অনুষ্ঠিত স্মৃতিচাৰণ সভাত সভাপতিত্ব কৰে জ্যেষ্ঠ নাগৰিক তথা অৱসৰপ্ৰাপ্ত শিক্ষক প্ৰতাপ চন্দ্ৰ দত্তই ৷
সভাত প্ৰতাপ চন্দ্ৰ দত্তই কয়, প্ৰয়াত ৰাজেন দওক মানুহে সমাজ সংগঠক ৰূপে স্বীকৃতি দিছে ৷ সুন্দৰপুৰ প্ৰাথমিক বিদ্যালয় আৰু সুন্দৰপুৰ বৰনামঘৰ প্ৰতিষ্ঠাৰ বাবে তেওঁ যি শ্ৰম আৰু ত্যাগক স্বীকাৰ কৰি গ’ল তাক সকলোৱে স্বীকৃতি প্ৰদান কৰিছে ৷ এনে অনুষ্ঠান গঢ়াৰ বাবে তেওঁ মানুুুহৰ ঘৰে ঘৰে বাঁহ কাঠ সংগ্ৰহ কৰিছিল ৷ ৰাজেন দত্ত কামৰ মাজেৰে জীয়াই থাকিব বুলি প্ৰতাপ দত্তই মন্তব্য কৰে। অনুষ্ঠানত অৰ্জুন ভোগেশ্বৰ বৰুৱা উপস্থিত থাকি ৰাজেন দত্তক শ্ৰদ্ধাৰে সোঁৱৰণ কৰে ৷
শিৱসাগৰ মহাবিদ্যালয়ৰ অৱসৰপ্ৰাপ্ত উপাধ্যক্ষা তথা ভালেকেইটা নাৰী সংগঠনৰ নেত্ৰী মণিকা শইকীয়াই কয়, ৰাজেন দত্তই সামাজিক আৰু সাংস্কৃতিক ক্ষেত্ৰলৈ আগবঢ়াই যোৱা অৱদানে তেওঁক জীয়াই ৰাখিব ৷ শিক্ষাবিদ ড° যোগেশ বৰাই প্ৰয়াত ৰাজেন দত্তক সমাজৰ প্ৰকৃত বন্ধু বুলি অভিহিত কৰে ৷
সমাজকৰ্মী সুশীল বৰুৱাই কয়, ৰাজেন দত্তই পৰম্পৰা ৰক্ষা কৰিও নাট, ভাওনা, ৰাস সহিতে বহু অনুষ্ঠানত নতুনত্ব দিছিল ৷ ৰাজহুৱা অনুষ্ঠানত নিজৰ ধন ব্যয় কৰিবলৈ ৰাজেন দত্তই কুণ্ঠাবোধ কৰা নাছিল ৷ তেওঁৰ নেতৃত্বত এই অঞ্চল সাংস্কৃতিক দিশত আগবাঢ়ি গৈছিল।
শিৱসাগৰ কলেজৰ প্ৰাক্তন গ্ৰন্থগাৰিক তথা গীতিকাৰ দেৱ হাজৰিকাই স্মৃতিচাৰণ কৰি কয়, বিশালতাৰে ভৰপূৰ ৰাজেন দত্ত ব্যক্তি নহয়, এক অনুষ্ঠান আছিল ৷ নৱপ্ৰজন্মক উৎসাহিত কৰাৰ বাবে ৰাজেন দত্তৰ জীৱন আৰু কৰ্মৰ সন্দৰ্ভত এখন গ্ৰন্থ প্ৰস্তুত কৰাৰ প্ৰয়োজন বুলিও তেওঁ মন্তব্য কৰে ৷
ৰাজেন দত্তৰ স্মৃতিত প্ৰকাশ কৰা স্মৃতিগ্ৰন্থ “স্মৃতি সঁফুৰাৰ আঁৰত ৰাজেন” উন্মোচনী সভাৰ আঁতধৰি সম্পাদক ৰঞ্জিত দত্তই ৰাজেন দত্তৰ মৃত্যুৱে সমাজৰ অপূৰণীয় ক্ষতি সাধন কৰা বুলি মন্তব্য কৰে ৷ তেওঁ কয় ৰাজেন দত্তই সংগ্ৰাম কৰি প্ৰতিষ্ঠা লাভ কৰিছিল৷ তেওঁ অসম আন্দোলনত প্ৰত্যক্ষ ভাৱে জড়িত হৈছিল ৷
বিশিষ্ট শিক্ষাবিদ মোহিনী কুমাৰ মহন্তই স্মৃতিগ্ৰন্থ উন্মোচন কৰি কয় যে, ৰাজেন দত্তক এই স্মৃতিগ্ৰন্থত বিচাৰি পোৱা যাব ৷ সময় কাৰো বাবে ৰৈ নেথাকে ৷ এই ক্ষণস্থায়ী সময়ত মানুহে সমাজৰ বাবে কাম কৰিব লাগিব ৷ অসমীয়া সমাজ জীৱনত মহাপুৰুষ শ্ৰীমন্ত শঙ্কৰদেৱৰ মৃত্যুৰ পিছত মাধৱদেৱে জীৱন চৰিত লিখিলে ৷ লক্ষ্মীনাথ বেজবৰুৱাৰ পিতৃয়ে প্ৰকাশ কৰা বৰচৰিটো এখন স্মৃতিগ্ৰন্থ ৷ এই জীৱন চৰিতসমূহক তেওঁ স্মৃতিগ্ৰন্থৰ আখ্যা দিয়ে ৷
অনুষ্ঠানৰ আৰম্ভণিতেই প্ৰয়াত ৰাজেন দত্তৰ প্ৰতিচ্ছবিৰ সন্মুখত বন্তি প্ৰজ্বলন কৰে তেওঁৰ সহধৰ্মিনীয় নিকু দত্ত, পুত্ৰ ৰাজা দত্ত আৰু তনয়া ডা° ৰিতুস্মৃতা দত্তই ৷ মাংগলিক কাৰ্যভাগিত প্ৰাৰ্থনা কৰে নিমাক্ষী বড়া দত্তই ৷ ভাতৃ পিয়লী দত্ত, নিৰেন দত্ত, অনিমা দত্ত শইকীয়া, লিলি দত্ত, প্ৰণতি দত্ত শইকীয়াই স্মৃতিচাৰণ কৰে ৷
অনুষ্ঠানত বিশিষ্ট নাগৰিক দুৰ্লভ বৰা, শিৱসাগৰ ছোৱালী কলেজৰ প্ৰাক্তন অধ্যক্ষ, ড° হেমন্ত কুমাৰ ফুকন, অৱসৰপ্ৰাপ্ত শিক্ষক ৰাজীব ফুকন, ডা° পৰমানন্দ ভড়ালী, শান্তনু বৰঠাকুৰ, মন ৰাজগুৰু, বিমল ভৰালী, প্ৰদীপ কলিতা, প্ৰদীপ বৰা, যোগেন্দ্ৰ নাথ দত্ত, বিকাশ হাজৰিকা, প্ৰশান্ত দত্তকে আদিকৰি ভালেসংখ্যক লোক উপস্থিত থাকি ৰাজেন দত্তক স্মৃতিচাৰণ কৰে ৷
উল্লেখ্য যে ৰাজেন দত্তই সুন্দৰপুৰ প্ৰাথমিক বিদ্যালয়ৰ অন্যতম প্ৰতিষ্ঠাপক হোৱাৰ উপৰি ৰংপুৰ কলাকৃষ্টি সংঘৰ সভাপতিৰ দায়িত্ব লৈ কেইবাটাও বছৰধৰি সেৱা আগবঢ়াইছিল ৷ যোৱা ২৬ আগষ্টৰ আবেলি তেওঁ হায়দৰাবাদৰ এখন চিকিৎসালয়ত শেষ নিশ্বাস ত্যাগ কৰিছিল।