ডিজিটেল সংবাদ,শিৱসাগৰঃ গৰু চোৰৰ বাতৰি সংগ্ৰহ কৰিবলৈ যোৱা দুই সাংবাদিকক আক্ৰমণ কৰা ঘটনাই চাঞ্চল্যৰ সৃষ্টি কৰিছে। আহত সাংবাদিক দুজনক সংকটজনক অৱস্থাত চিকিৎসালয়ত ভৰ্তি কৰোৱা হৈছে ৷ সাংবাদিক দুগৰাকী ক্ৰমে অনন্ত স্মিথ আৰু আচিফ আলী ৷
আখৈফুটীয়াৰ চাহিল আলী,জেঙনিকটীয়াৰ শ্বাহ পথৰ ৰফিক শ্বাহ, তাকৰিম আহমেদ, কলীয়া আৰু মাইনা নামৰ লোক কেইজনে সাংবাদিক দুজনক আক্ৰমণ কৰে। এই ঘটনাক লৈ শিৱসাগৰত তীব্ৰ প্ৰতিক্ৰিয়াৰ সৃষ্টি হৈছে ৷ সাংবাদিকক আক্ৰমণৰ ঘটনাক লৈ গৰজি উঠিছে বীৰ লাচিত সেনা সহিতে কেইবাটাও সংগঠন৷
এঘন্টাৰ ভিতৰত আক্ৰমণকাৰীক গ্ৰেপ্তাৰ নকৰিলে পথ অৱৰোধৰ হুংকাৰ বীৰ লাচিত সেনাৰ ৷বীৰ লাচিত সেনাৰ নেতা শৃংখল চলিহাই এঘন্টাৰ ভিতৰত আক্ৰমণকাৰীক গ্ৰেপ্তাৰ নকৰিলে কে পি চাৰিআলিত পথ অৱৰোধৰ হুংকাৰ দিয়ে ৷
শৃংখল চলিহাই আখৈফুটীয়াৰ চাহিল আলী,জেঙনিকটীয়াৰ শ্বাহ পথৰ ৰফিক শ্বাহ, তাকৰিম আহমেদ, কলীয়া আৰু মাইনাক কঠোৰ শাস্তি প্ৰদানৰ দাবী জনাইছে ৷ উল্লেখ্য যে, ইতিমধ্যে আৰক্ষীয়ে দুই আক্ৰমণকাৰীক আটক কৰিছে ৷