নাজিৰাৰ নিচামুক্তি কেন্দ্ৰত ৰহস্যজনকভাৱে ৰুগ্ন হোৱা যুৱকৰ মৃত্যু...

ডিজিটেল সংবাদ শিৱসাগৰঃ ৰাজ্যৰ বিভিন্ন প্ৰান্তত কাঠফুলাৰ দৰে গঢ়লৈ উঠা নিচামুক্তি কেন্দ্ৰসমূহৰ একাংশত ইতিপূৰ্বে ভালেকেইটা হত্যাকাণ্ড সংঘটিত হোৱাৰ গুৰুতৰ অভিযোগ উঠিছে ৷ শেহতীয়াভাৱে শিৱসাগৰ জিলাৰ নাজিৰাত থকা এটা নিচামুক্তি কেন্দ্ৰ পৰিচালনা কৰা ব্যক্তিৰ অত্যাচাৰ আৰু অৱহেলাৰ বাবেই এজন যুৱকে অকাল মৃত্যুক আকোঁৱালি লোৱাৰ গুৰুত্বৰ অভিযোগ উঠিছে ৷

এই ঘটনাৰ সন্দৰ্ভত আজি দুৰ্ভগীয়া যুৱকজনৰ পৰিয়ালৰ লোকে শিৱসাগৰ জিলা আৰক্ষী অধীক্ষকক তদন্ত বিচাৰি এখন এজাহাৰ দাখিল কৰিছে ৷ এজাহাৰত উল্লেখ কৰা অনুসৰি যোৰহাট জিলা মৰিয়নীৰ ভেলগুৰি অঞ্চলৰ বকুল ৰাণা নামৰ ব্যক্তিজনৰ পুত্ৰ বাবুল ৰাণা ওৰফে বাবলু ( ২৭) য়ে অত্যাধিক সুৰাপান কৰাৰ বাবে পৰিয়ালৰ লোকে বিগত বৰ্ষৰ ২০ ছেপ্টেম্বৰত নাজিৰাৰ লিগিৰী পুখুৰীৰ সমীপৰ লক্ষিমী পুখুৰীৰ কাষত অৱস্থিত ৰিভাৰচে'ল ফাউণ্ডেচন নামৰ নিচামুক্তি কেন্দ্ৰৰ আশ্ৰয় লয় ৷ 

নিচামুক্তি কেন্দ্ৰটোৱে যুৱক জনক নিজৰ জিম্মাত লয় যদিও যুৱক জনৰ ওপৰত নিৰ্মম অত্যাচাৰ চলোৱাৰ গুৰুত্বৰ অভিযোগ এজাহাৰত উল্লেখ কৰিছে ৷ বিগত অক্টোবৰ মাহত পৰিয়ালৰ লোকে বাবলু ৰাণাক সাক্ষাৎ কৰাৰ বাবে নিচামুক্তি কেন্দ্ৰটোত উপস্থিত হয় যদিও পৰিয়ালৰ লোকক যুৱকজনক সাক্ষাৎ কৰিবলৈ নিদিলে দায়িত্বত থকা কেন্দ্ৰৰ কৰ্মচাৰীয়ে ৷

শেহতীয়াকৈ যোৱা ৩ মে’ৰ দিনা পৰিয়ালৰ লোকে নিচামুক্তি কেন্দ্ৰটোলৈ বাবুলুৰ খবৰ ল'বলৈ ফোন কৰে যদিও কৰ্মচাৰীসকলে ৰহস্যজনকভাৱে যুৱকজনৰ লগত পৰিয়ালৰ লোকক কথা পাতিবলৈ নিদিলে ৷ নিচামুক্তি কেন্দ্ৰ কৰ্তৃপক্ষই যুৱকজন ভালে আছে বুলি পৰিয়ালৰ লোকক অবগত কৰে ৷

কিন্তু এটা দিনৰ পিছতেই অৰ্থাৎ ৪ মে’ৰ দুপৰীয়া বাৰ ১২-১৭ বজাত ফোন কৰি নিচামুক্তি কেন্দ্ৰ কৰ্তৃপক্ষই বাবুল ৰাণা জয়সাগৰস্থিত অসামৰিক চিকিৎসালয়ৰ আই চি ইউত ভৰ্তি হৈ থকা বুলি জানিবলৈ দিয়ে । পৰিয়ালৰ লোকে জয়সাগৰ চিকিৎসালয়ত উপস্থিত হৈ অতি সংকটজনক অৱস্থাত বাবলু ৰাণাক আবেলি চাৰে তিনি বজাত যোৰহাট মেডিকেল কলেজলৈ লৈ যায় ৷

কিন্তু মেডিকেলক চিকিৎসা লাভৰ পূৰ্বেই ৪-৪৫ বজাত যুৱকজনৰ মৃত্যু হয় ৷ মৰণোত্তৰ পৰীক্ষাৰ অন্তত ৰিপ'ৰ্ট ৫ মে'ৰ দিনা মৰিয়নীয় শেষকৃৰ্ত্য সম্পন্ন কৰা হয় ৷ মৃত্যুৰ পূৰ্বে যুৱকজনে নিচামুক্তি কেন্দ্ৰত তেওৰ ওপৰত বৰ্বৰ অত্যাচাৰ চলোৱা বুলি অভিযোগ কৰিছিল বুলিও জানিব পৰা গৈছে ৷

Also Read: দুৰন্ত তৰুণ ঘনশ্যাম শইকীয়াৰ ১০৮ বছৰীয়া জন্মজয়ন্তী উদযাপন...