ডিজিটেল সংবাদ বিহালীঃ বিশ্বনাথ চাৰিআলি বামগাঁৱৰ এক ভাড়াঘৰৰ কোঠাত অৰ্ধগলিত অৱস্থাত বিহালীৰ বিহমাৰীৰ এজন ছাত্ৰৰ মৃতদেহ উদ্ধাৰ হোৱা ঘটনাই চাঞ্চল্যৰ সৃষ্টি কৰিছে। বিশ্বনাথৰ বামগাঁৱৰ এক ভাড়া ঘৰত যোৱা পাঁচ বছৰ ধৰি ভাড়াতীয়া হিচাপে আছিল ছাত্ৰগৰাকী৷
আজি সমগ্ৰ এলেকা ব্যাপি এক দুৰ্গন্ধ বিয়পি পৰাত ঘৰৰ মালিকে অনুসন্ধান চলোৱাত ভাড়া ঘৰৰ কোঠাৰ ভিতৰত ফেনত ছিপ লৈ থকা অৱস্থাতত প্ৰত্যক্ষ কৰে। জানিব পৰামতে ছাত্ৰজনক বিশ্বনাথ মহাবিদ্যালয়ৰ স্নাতক ষষ্ঠ ষান্মাসিকৰ জীৱন কাৰডং (২৩) বুলি চিনাক্ত কৰা হৈছে।
ছাত্ৰজন বিহমাৰীৰৰ লোকেশ্বৰ কাৰডংৰ পুত্ৰ বুলি জানিব পৰা গৈছে। ছাত্ৰগৰাকীৰ যোৱা দেওবাৰেই মৃত্যু হোৱাৰ সন্দেহ কৰা হৈছে। ইতিমধ্যে দণ্ডাধীশৰ উপস্থিতিত আৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে।আৰক্ষীৰ তদন্তৰ পিছতহে পোহৰলৈ আহিব ছাত্ৰ গৰাকীৰ মৃত্যুৰ প্ৰকৃত কাৰণ।