ডিজিটেল সংবাদ, কোকৰাঝাৰঃ দেশ তথা ৰাজ্যৰ বিভিন্ন প্ৰান্তৰ লগতে বিটিআৰৰ সদৰ কোকৰাঝাৰতো আজি উদযাপন কৰা হয় শ্ৰী শ্ৰী ঠাকুৰ অনুকূলচন্দ্ৰৰ ১৩৬ তম জন্ম মহোৎসৱ ৷ ঠাকুৰ অনুকূলচন্দ্ৰৰ জন্ম মহোৎসৱক লৈ বিটিআৰৰ বিভিন্ন প্ৰান্তৰ পৰা অহা হাজাৰ হাজাৰ ভক্তৰ সমাগমেৰে কোকৰাঝাৰ চহৰ উখল মাখল হৈ পৰে ।
কোকৰাঝাৰ সৎসঙ্গ বিহাৰ আৰু মাগুৰমাৰী সৎসঙ্গ বিহাৰৰ উদ্যোগত দিনজোৰা বৰ্ণাঢ্য কাৰ্যসূচীৰে কোকৰাঝাৰ ৰাসমেলা পথাৰত উদযাপন কৰা হয় শ্ৰী শ্ৰী ঠাকুৰ অনুকূলচন্দ্ৰৰ এই জন্ম মহোৎসৱ ৷
ৰাতিপুৱা ৫ বজাত উষাকীৰ্ত্তনৰে শ্ৰী শ্ৰী ঠাকুৰ অনুকূলচন্দ্ৰৰ জন্ম মহোৎসৰ দিনজোৰা কাৰ্যসূচীৰ শুভাৰম্ভ কৰা হয় ৷ ৰাতিপুৱা ৬-৩০ বজাত প্ৰাত:কালীন বিনতি প্ৰাৰ্থনা , অমৰ সংগীত , সমবেত নাম - জপ , অমিয় গ্ৰন্থাদি আদি পাঠ কৰা হয় ৷ পুৱা ৯ বজাত সঙ্গীতঞ্জলি আৰু ১০ বজাত শ্ৰী শ্ৰী ঠাকুৰ, শ্ৰী শ্ৰী বড়মা আৰু শ্ৰী শ্ৰী বড়দাৰ ভোগ নিবেদন কৰা হয় ৷
উল্লেখ্য যে ঠাকুৰ অনুকূলচন্দ্ৰৰ জন্ম মহোৎসৱ উদযাপনৰ সতে সংগতি ৰাখি পুৱা ১১ বজাত কোকৰাঝাৰ চহৰত ঠাকুৰ অনুকূলচন্দ্ৰৰ প্ৰতিকৃতি লৈ এক বিশাল বৰ্ণাঢ্য শোভাযাত্ৰা উলিওৱা হয় ৷ শোভাযাত্ৰাত হাজাৰ হাজাৰ ভক্তৰ লগতে বিভিন্ন জাতি -জনগোষ্ঠীৰ কলা-কৃষ্টিৰ দলে অংশগ্ৰহণ কৰে ৷ শোভাযাত্ৰাৰ অন্তত কোকৰাঝাৰৰ আৰ এন বি অসামৰিক হস্পিতাল আৰু এম আৰ এম নাৰ্ছিং হস্পিতালত ফলমূল বিতৰণ কৰা হয় ৷ বিয়লি এক বজাত ভাণ্ডাৰৰ প্ৰসাদ বিতৰণ আৰু বিয়লি ২ বজাৰ পৰা সৎসঙ্গী সন্মিলন অনুষ্ঠিত হয় ৷ শ্ৰী শ্ৰী ঠাকুৰ অনুকূলচন্দ্ৰৰ ১৩৬ তম জন্ম মহোৎসৱ উদযাপন কাৰ্যসূচীত বিটিআৰৰ বিভিন্ন জিলাৰ লগতে ধুবুৰী জিলাৰ পৰা অহা হাজাৰ হাজাৰ ভক্তৰ সমাগম ঘটে ৷