উচ্চতম ন্যায়ালয়ৰ ৰায়ক আপৰ ৰাজ্যিক সভাপতিৰ আদৰণি...

ডিজিটেল সংবাদ গুৱাহাটীঃ বিদেশী নাগৰিকৰ ভিত্তি বৰ্ষক লৈ আজি উচ্চতম ন্যায়ালয়ে প্ৰদান কৰা ৰায়ক এক ঐতিহাসিক আৰু যুগান্তকাৰী ৰায় হিচাপে আখ্যা দিলে আম আদমী পাৰ্টিৰ ৰাজ্যিক সভাপতি মনোজ ধানোৱাৰে। শীৰ্ষ আদালতৰ ৰায়লৈ আদৰণি জনাই এক প্ৰেছ বিজ্ঞপ্তি যোগে আপৰ নেতাগৰাকীয়ে কয়, অসমৰ ৰাজনৈতিক ইতিহাসৰ কাৰণে আজি এটা গুৰুত্বপূৰ্ণ দিন । আজিৰ এই ঐতিহাসিক ৰায়ে দীৰ্ঘদিনীয়া বিদেশী নাগৰিকৰ সমস্যাৰ স্থায়ী সমাধানৰ পথ মুকলি কৰিলে।

তদুপৰি উচ্চতম ন্যায়ালয়ৰ গুৰুত্বপূৰ্ণ ৰায়ে বিদেশী নাগৰিক চিনাক্তকৰণ আৰু বহিস্কৰণৰ ক্ষেত্ৰত অসম চুক্তিত উল্লেখিত ভিত্তিবৰ্ষক অধিক গ্ৰহণযোগ্য কৰি তুলিলে। এতিয়াৰ পৰা এই ক্ষেত্ৰত কোনো সন্দেহৰ অৱকাশ নাথাকিব।

১৯৭১ চনৰ ২৪ মাৰ্চৰ পিছত অহা সকলো বিদেশীয়ে অসম এৰি যাব লাগিব। উচ্চতম ন্যায়ালয়ৰ পাঁচজনীয়া সাংবিধানিক বিচাৰপীঠৰ এই গুৰুত্বপূৰ্ণ ৰায় আম আদমী পাৰ্টিয়ে আদৰণি জনাইছোঁ।

বিদেশী নাগৰিকৰ ভিত্তি বৰ্ষক লৈ চলি থকা এই বিতৰ্কৰ অৱসান হ'ল। এতিয়া খিলঞ্জীয়া অসমীয়াৰ সংৰক্ষণৰ বিষয়ত চৰকাৰে গুৰুত্ব দিয়া উচিত। আজি শীৰ্ষ আদালতৰ ৰায় ঘোষণাৰ পিচতে এনেদৰে প্ৰতিক্ৰিয়া ব্যক্ত কৰে মনোজ ধানোৱাৰে।

তদুপৰি এখন বিদেশী মুক্ত অসমৰ স্বাৰ্থত ধানোৱাৰে সকলো ধৰণৰ প্ৰতিবন্ধকতা দূৰ কৰি শীঘ্ৰেই ৰাষ্ট্ৰীয় নাগৰিক পঞ্জী ৰূপায়ন কৰিবলৈ দাবী জনায়। ১৯৭১ চনৰ ২৪ মাৰ্চৰ মাজনিশাৰ পিচত ভাৰতত অনুপ্ৰৱেশ কৰা প্ৰতিগৰাকী বিদেশীক চিনাক্তকৰণৰ জৰিয়তে বহিস্কৰণৰ ব্যৱস্থা কৰিবলৈ আপৰ নেতাগৰাকীয়ে আহ্বান জনায়।

উল্লেখ্য যে আজি শীৰ্ষ আদালতে দিয়া ৰায়ত এটা কথা স্পষ্ট কৰিছে যে এতিয়াৰ পৰা বিদেশী নাগৰিকৰ চিনাক্তকৰণ আৰু বহিস্কৰণৰ প্ৰক্ৰিয়া উচ্চতম ন্যায়ালয়ৰ তত্বাৱধানতেই সম্পন্ন হ'ব।

Also Read: বটদ্ৰৱাৰ শিঙিয়া দলনি সাৰ্বজনীন শ্ৰী শ্ৰী গোপাল কৃষ্ণ গৰখীয়া থানত কাতি বিহু পালন