শিলচৰত অগপৰ বিশাল কৰ্মকৰ্তা সন্মিলন

ডিজিটেল সংবাদ, শিলচৰঃ অসম গণ পৰিষদৰ বিশেষ কৰ্মকৰ্তা সন্মিলন। কৰিমগঞ্জ লোকসভা সমষ্টিত শুকুৰবাৰে অসম গণ পৰিষদৰ বিশেষ কৰ্মকৰ্তা সন্মিলন অনুষ্ঠিত হয়। ইয়াৰ পাছত শনিবাৰে বৰাক উপত্যকাৰ শিচলৰ চহৰৰ মাজমজিয়াত শিলচৰ লোকসভা সমষ্টিৰ কেইবাহাজাৰ দলীয় কৰ্মকৰ্তাৰ উপস্থিতিত অগপ দলৰ আন এখন বিশেষ কৰ্মকৰ্তা সন্মিলন অনুষ্ঠিত হয়।

উক্ত সন্মিলনত সভাপতিত্ব কৰে অগপৰ সভাপতি তথা মন্ত্ৰী অতুল বৰাই। সভাপতি বৰাই কয় যে "প্ৰগতিশীল জাতীয়তাবাদী চিন্তাধাৰাৰে ঐক্যবদ্ধভাৱে বৰাক-ব্ৰহ্মপুত্ৰ, পাহাৰ-ভৈয়াম সকলোতে নতুন প্ৰজন্মৰ হৃদয়লৈ অগপক লৈ যাব লাগিব, যাতে অসম গণ পৰিষদে সকলো নিৰ্বাচনী যুঁজতে হেলাৰঙে বিজয়ধ্বজা উৰুৱাবলৈ সক্ষম হয়।"

লগতে দলীয় কৰ্মকৰ্তাসকলক সম্বোধন কৰি সভাপতি অতুল বৰাই কয় যে, "যিকোনো প্ৰতিবন্ধকতা আৰু প্ৰত্যাহ্বান নেওচি বৰাক-ব্ৰহ্মপুত্ৰ, পাহাৰ-ভৈয়াম সকলোতে অসম গণ পৰিষদক অধিক শক্তিশালী কৰাটোৱেই দলটোৰ প্ৰধান লক্ষ্য।" কৰিমগঞ্জৰ দৰে কাছাৰ জিলাৰ অসম গণ পৰিষদৰ কৰ্মকৰ্তাসকলৰো পাৰভঙা উৎসাহ দেখি অত্যন্ত অভিভূত হৈ সভাপতি বৰাই দৃঢ়তাৰে কয় যে বৰাকৰ নীলিম আকাশত অসম গণ পৰিষদৰ কৰ্মকৰ্তাসকলে গৌৰৱ ধ্বজা অনাগত দিনবোৰত শক্তিশালীভাৱে ধৰি ৰাখিব পাৰিব।

ব্ৰহ্মপুত্ৰ উপত্যকাৰ সমান্তৰালভাৱে বৰাক উপত্যকাতো জাতি-ধৰ্ম-বৰ্ণ নিৰ্বিশেষে সৰ্বস্তৰৰ জনসাধাৰণৰ সমৰ্থনেৰে অসম গণ পৰিষদে অপ্ৰতিৰোধ্য গতি লাভ কৰিছে। আজি শিলচৰ লোকসভা সমষ্টিৰ অৰ্ন্তগত ৭টা বিধান পৰিষদৰ কৰ্মীসকল একত্ৰিত হৈ আয়োজন কৰা শিলচৰ লোকসভা সমষ্টি ভিত্তিক বিশেষ কৰ্মকৰ্তা সন্মিলনত উপস্থিত থাকি সুস্পষ্ট ইঙ্গিত বহন কৰিছে বুলি তেওঁ উল্লেখ কৰে ৷

লগতে সভাপতিগৰাকীয়ে অগপ দলক সমৰ্পিত কৰ্মকৰ্তাসকলৰ নিৰন্তৰ প্ৰয়াসৰ ফলত অগপৰ এই দুৰন্ত গতিয়ে সৰ্বব্যাপী প্ৰসাৰিত হোৱাৰ কামনা কৰে। অসমৰ বুকুত অসম গণ পৰিষদ শক্তিশালী হোৱা মানেই আঞ্চলিকতাবাদ শক্তিশালী হোৱা আৰু আঞ্চলিকতাবাদ শক্তিশালী হোৱা মানেই অসম সুৰক্ষিত হোৱা বুলি মন্তব্য কৰে।

আনহাতে শিলচৰ লোকসভাৰ সমষ্টিৰ অন্তৰ্গত অগপৰ ৭টা বিধান পৰিষদৰ কৰ্মকৰ্তাসকলক জাতি-ধৰ্ম-বৰ্ণ নিৰ্বিশেষে সকলো লোককে একত্ৰিত কৰি দলটোৰ সাংগঠনিক ভেটি মজবুত কৰাৰ বাবে নিষ্ঠাৰে আত্মনিয়োগ কৰিবলৈ সভাপতি বৰাই আহ্বান জনায়। দলৰ কাৰ্যকৰী সভাপতি তথা মন্ত্ৰী কেশৱ মহন্ত সন্মিলনত উপস্থিত থাকি দলৰ সভাপতি অতুল বৰাৰ সুদক্ষ নেতৃত্বত অগপ দলে অসমৰ ৰাজনৈতিক প্ৰেক্ষাপটত এক শক্তিশালী আঞ্চলিক শক্তি হিচাপে অৱস্থান কৰিছে বুলি মতপ্ৰকাশ কৰে।

আসন্ন পঞ্চায়ত আৰু লোকসভা নিৰ্বাচনত বিৰোধীক নসাৎ কৰি মিত্ৰজোঁটৰ চৰকাৰ গঠনৰ বাবে দল এতিয়াৰে পৰা তৎপৰ হ'ব লাগিব বুলি কাৰ্য্যকৰী সভাপতি মহন্তই মন্তব্য কৰে ৷ আগন্তুক নিৰ্বাচনসমূহত মিত্ৰজোঁটৰ শক্তিশালী অংশীদাৰ হিচাপে যাতে বৰাক উপত্যকাক শক্তিশালী দুৰ্গলৈ পৰিণত কৰিব পৰা যায়, তাৰবাবে তৃণমূল পৰ্যায়ৰ পৰাই দলটোক টনকিয়াল কৰিবলৈ মহন্তই আহ্বান জনায়।

মন্ত্ৰী মহন্তই কয় যে, "সমাগত নিৰ্বাচনত অসম গণ পৰিষদ দলৰ কৰ্মীসকলৰ ঐক্যবদ্ধ প্ৰচেষ্টাত বৰাক উপত্যকাত মিত্ৰজোঁটৰ বিজয় ৰথে দুৰন্ত গতি লাভ কৰিব ।" উক্ত সন্মিলনত দলৰ জ্যেষ্ঠ নেতা ফণীভূষণ চৌধুৰী, সাংসদ তথা দলৰ সাধাৰণ সম্পাদক বীৰেন্দ্ৰ প্ৰসাদ বৈশ্য, সাধাৰণ সম্পাদক ভূপেন ৰায়, বিমলেন্দ সিংহ, উপ-সভাপতি সুনীল ডেকা, কেন্দ্ৰীয় সমিতিৰ বিষয়ববীয়া আৰু শিলচৰ লোকসভা সমষ্টিৰ অন্তৰ্গত সমূহ জিলা আৰু বিধান পৰিষদৰ বিষয়ববীয়া আৰু সদস্যসকল, অগপৰ বিভিন্ন স্তৰৰ জ্যেষ্ঠ-কনিষ্ঠ নেতা আৰু বিষয়ববীয়াসকল, অসম যুৱ পৰিষদ, অসম ছাত্ৰ পৰিষদ, অসম কৃষক পৰিষদ, অসম মহিলা পৰিষদ প্ৰমুখ্যে আন ভাতৃ-ভগ্নী সংগঠনৰ বিষয়ববীয়াসকল, কৰ্মকৰ্তাসকল আজিৰ সভাত উপস্থিত থাকে।

Also Read: সোনাইপৰীয়া ৰঙালী বিহু উৎসৱৰ সফল সামৰণি