অসম-মেঘালয় সীমা সমস্যা : মেঘালয়ৰ উপ-মুখ্যমন্ত্ৰীৰে খান্দুলি অঞ্চল পৰিদৰ্শন পীযুষ হাজৰিকাৰ

ডিজিটেল ডেস্ক : অসম-মেঘালয়ৰ সীমা সমস্যা সন্দৰ্ভত মেঘালয়ৰ উপ মুখ্যন্ত্ৰীৰে জনসংযোগ মন্ত্ৰী পীযুষ হাজৰিকাৰ বৈঠক অনুষ্ঠিত কৰা হয়। মন্ত্ৰী পীযুষ হাজৰীকাই বুধবাৰে অসম-মেঘালয়ৰ সীমা সমস্যা সমাধানৰ বাবে গঠিত আঞ্চলিক সমিতিৰ অধ্যক্ষ হিচাপে সমিতিৰ আন সদস্যসকলৰ সৈতে মেঘালয়ৰ উপ-মুখ্যমন্ত্ৰী এচ. ধৰৰ লগত সীমামূৰীয়া খান্দুলি অঞ্চল ভ্ৰমণ কৰি এখন বৈঠকত অংশ লয় ।

এই বৈঠকত ৰাজ্যখনৰ আন বিষয়াসকলো উপস্থিতি থাকে। অসমৰ পশ্চিম কাৰ্বি আংলঙ জিলা আৰু মেঘালয়ৰ পশ্চিম জয়ন্তীয়া হিলচ জিলাৰ মাজত থকা সীমা সমস্যা সমাধানৰ বাবে গঠন কৰি দিয়া আঞ্চলিক সমিতি দুখনৰ সদস্যসকলে প্ৰথমবাৰৰ বাবে বুধবাৰে যুটীয়াভাৱে বিবদমান খান্দুলি অঞ্চল পৰিদৰ্শন কৰে।

মন্ত্ৰী পীযুষ হাজৰীকাই উপ-মুখ্যমন্ত্ৰীগৰাকীৰ সৈতে অঞ্চলটোৰ মেঘালয়ৰ দিশত থকা স্থানীয় ৰাইজৰ প্ৰতিনিধিসকলৰ পৰা স্মাৰকপত্ৰ গ্ৰহণ কৰে । ইয়াৰ পাছত সীমামূৰীয়া স্থানসমূহ পৰিদৰ্শন কৰি মন্ত্ৰী দুগৰাকীয়ে খান্দুলিস্থিত সীমান্ত আৰক্ষী চকীত এখন বৈঠকত সমিতি দুখনৰ সদস্যসকলৰ লগত মিলিত হয় ।

ইয়াতে অসমৰ দিশৰ স্থানীয় ব্যক্তিসকলৰ দল-সংগঠনৰ প্ৰতিনিধিবৰ্গই দুয়োগৰাকী মন্ত্ৰীকে সীমা সমস্যাবিষয়ক তেওঁলোকৰ স্মাৰকপত্ৰ প্ৰদান কৰে । মন্ত্ৰী হাজৰীকাই আজিৰ পৰিদৰ্শন আৰু বৈঠকৰ সময়ত নিজৰ মন্তব্য প্ৰদান কৰি কয় যে, দুয়োখন আঞ্চলিক সমিতিয়ে সোনকালে পুনৰ এবাৰ অঞ্চলটো ভ্ৰমণ কৰি স্থানীয় লোকসকলৰ মতামত গ্ৰহণ কৰিব ।

স্থানীয় ব্যক্তিসকলৰ মতামতৰ ওপৰত ভিত্তি কৰি আৰু সাংবিধানিক সীমাৰ ওপৰত বিবেচনা কৰি দুয়োখন সমিতিয়ে ৰাজ্য দুখনৰ মুখ্যমন্ত্ৰীক প্ৰতিবেদন দাখিল কৰিব বুলি মন্ত্ৰী হাজৰীকাই উল্লেখ কৰে । আনহাতে চুবুৰীয়া ৰাজ্য দুখনৰ মাজত বহুখিনি সীমা সমস্যা ইতিমধ্যেই সমাধান হোৱা বুলি উল্লেখ কৰি সোনকালেই বাকী থকা স্থানসমূহতো সীমা সমস্যা সমাধান হ'ব বুলি মন্ত্ৰীগৰাকীয়ে নিজৰ দৃঢ়তা প্ৰকাশ কৰে ।

ইয়াৰ পাছতে সাংবাদিকৰ আগত মন্ত্ৰীগৰাকীয়ে মন্তব্য প্ৰদান কৰি কয় যে, অসমৰ মুখ্যমন্ত্ৰী ড° হিমন্ত বিশ্ব শৰ্মাৰ নেতৃত্বত ৰাজ্য চৰকাৰে চুবুৰীয়া ৰাজ্যকেইখনৰ সৈতে থকা সীমা সমস্যাৰ স্থায়ী সমাধানৰ বাবে প্ৰাথমিকতা প্ৰদান কৰি আন্তৰিকতাৰে কাম কৰি আছে । লগতে তেওঁ কয় যে অসম আৰু মেঘালয়ৰ বাসিন্দাসকলে পৰস্পৰৰ মাজত ভাতৃত্বভাৱেৰে বাস কৰি আহিছে আৰু ৰাজ্য দুখনৰ মুখ্যমন্ত্ৰী দুগৰাকীৰ আন্তৰিক সদিচ্ছাৰ বাবে সীমা সংক্ৰান্তীয় যিখিনি প্ৰাৰ্থক্য আছে সেয়াও সোনকালেই সমাধা হৈ উঠিব ।

মন্ত্ৰীগৰাকীক আজিৰ পৰিদৰ্শন আৰু বৈঠকৰ সময়ত বিধায়ক ৰূপসিং টেৰন, অসম চৰকাৰৰ ৰাজহ আৰু দুৰ্যোগ ব্যৱস্থাপনা বিভাগৰ প্ৰধান সচিব জি.ডি. ত্ৰিপাঠী, বিভাগীয় সচিব, পশ্চিম কাৰ্বি আংলং জিলাৰ আয়ুক্ত আৰু আৰক্ষী অধীক্ষকে সংগ দিয়ে। ইয়াৰ বিপৰীতে মেঘালয়ৰ উপ মুখ্যমন্ত্ৰীগৰাকীৰ লগত ৰাজ্যখনৰ কেইবাগৰাকীও শীৰ্ষ বিষয়া উপস্থিত থাকে।

Also Read: বিজেপি গেলিছ! -সিদ্ধাৰ্থ ভট্টাচাৰ্যই ভৱেশ কলিতালৈ চিঠি লিখিছে ...