![অসম নাট্য সন্মিলনৰ দ-পৰ্বতীয়া, প্ৰফুল্ল বৰা শাখা গঠন](http://media.assettype.com/asomiyapratidin%2F2024-07%2F6cceadb1-4f7f-45b1-925f-121261c587b0%2Fef195d89-e251-4109-8126-153f01f044f4.jpg?w=480&auto=format%2Ccompress&fit=max)
ডিজিটেল ডেস্ক : আধুনিক অসমীয়া নাট্য জগতৰ এগৰাকী অন্যতম নাট্যকাৰ প্ৰফুল্ল বৰাৰ সোঁৱৰণত তেজপুৰ চহৰৰ পশ্চিম প্ৰান্তত অৱস্থিত নাট্যকাৰগৰাকীৰ ওপজা গাঁও দ পৰ্বতীয়াত বৃহস্পতিবাৰে অসম নাট্য সন্মিলনৰ দ - পৰ্বতীয়া , প্ৰফুল্ল বৰা শাখা গঠন কৰা হয়। উল্লেখ্য যে , এই দ - পৰ্বতীয়াৰ চিত্ৰলেখা ৰংগমঞ্চত ১৯৫৬ চনত নাট্যকাৰ প্ৰফুল্ল বৰাই তেখেতৰ " আকাশৰ ৰং " নাটকৰ মঞ্চায়ণেৰে অঞ্চলটোত প্ৰথম সহ অভিনয় কৰাই সেই সময়ৰ ৰক্ষণশীল সমাজখনৰ হেঙাৰ আঁতৰ কৰি নাটকৰ জৰিয়তে এক বলিষ্ঠ ভূমিকা গ্ৰহণ কৰিছিল।
ঐতিহ্যমণ্ডিত বাণ থিয়েটাৰত প্ৰথম মঞ্চস্থ হোৱা নাট্যকাৰ প্ৰফুল্ল বৰাৰ " সাঁকো" নাটকে অসমীয়া নাট্য জগতত এক নব্য নাট্য আন্দোলনৰ সূচনা কৰিছিল। ইয়াৰ পৰৱৰ্তী সময়ত নাট্যকাৰ প্ৰফুল্ল বৰাৰ ' উপপথ ' , ' বৰুৱাৰ সংসাৰ ' , "বান" , 'তেজীমলা ' , দেবযানী , অলংকাৰ আদি নাটকেৰে নাট্যকাৰ গৰাকীয়ে এক সুকীয়া নাট্য ধাৰাৰ সৃষ্টি কৰে।
অসম নাট্য সন্মিলনৰ শোণিতপুৰ জিলা সমিতিৰ সভাপতি ত্ৰৈলোক্য মোহন নাথ , সন্মিলনৰ স্বৰ্ণপীঠ মণ্ডলৰ কাৰ্যকৰী সভাপতি নিত্যানন্দ নাথ আৰু সাংগঠনিক সম্পাদক ভূপেন বৰুৱাৰ উপস্থিতি আৰু তত্ত্বাৱধানত গঠন হোৱা অসম নাট্য সন্মিলনৰ দ পৰ্বতীয়া, প্ৰফুল্ল বৰা শাখা প্ৰতিষ্ঠাপক সভাপতিৰূপে আজি দায়িত্বভাৰ গ্ৰহণ কৰে খনীন্দ্ৰ নাথ গোস্বামীয়ে। শাখাটোৰ এগৰাকী উপদেষ্টাৰূপে আজিৰ সভাত উপস্থিত থাকে নাট্যকাৰ প্ৰফুল্ল বৰাৰ সহধৰ্মিণী প্ৰণতি বৰা।
অসম নাট্য সন্মিলনৰ দ - পৰ্বতীয়া, প্ৰফুল্ল বৰা শাখাৰ কাৰ্যকৰী সভাপতিৰূপে প্ৰতিষ্ঠিত মঞ্চ অভিনেতা হৰেকৃষ্ণ মহন্ত , উপ- সভাপতি ৰূপে প্ৰসিদ্ধ ভাস্কৰ্য শিল্পী মোহিনী হাজৰিকা , সম্পাদকৰূপে উদীয়মান লেখক , নাট্যকাৰ তথা নাট্যকাৰ প্ৰফুল্ল বৰাৰ কনিষ্ঠ পুত্ৰ প্ৰিয়াংকু বৰাই দায়িত্ব গ্ৰহণ কৰে। তদুপৰি শাখাৰ আন আন সদস্যসকল হ'ল - সহকাৰী সম্পাদক - বিনয় বৰা, কিশোৰ মহন্ত, সাংগঠনিক সম্পাদক দিপাংকৰ দত্ত , কোষাধ্যক্ষ নৱজ্যোতি তামূলী, প্ৰচাৰ সম্পাদক নয়ন জ্যোতি বৰা আদি।
কাৰ্যকৰী সদস্য -দীপক গোস্বামী, পুলক গোস্বামী, দিৱসমণি বৰা , সমীৰণ বৰা, কুন্টল গোস্বামী, জোনালী শইকীয়া , গীতা কাকতি, গোলোক মহন্ত , জয়দ্বীপ বৰা, চম্পামণি দিহিঙীয়া মহন্ত , বলীন বৰা, ৰেণুকা বৰা আদি। সদস্যসকল ক্ৰমে : হেমন্ত তামূলী , পংকজা বৰা, সমীংকু শৰ্মা , শেৱালী বৰা, কুলদ্বীপ হাজৰিকা , ঋতম হাজৰিকা, তুলিকা হাজৰিকা , টীপচি তালুকদাৰ বৰা , কাব্যশ্ৰী মহন্ত , গীতাঞ্জলি বৰা ,তিলক বৰা, সুনীল বৰা, কৌশিক মহন্ত , পল্লৱী মহন্ত , মিনু হাজৰিকা , শিখা বৰা, সাদৰ বৰা, ৰুণুমণি বৰা, মঞ্জু বৰা , পলি পটংগীয়া , ৰাজকুমাৰ মহন্ত , কাজল গোস্বামী , কাকু গোস্বামী , গীতুমণি বৰা, নৱ কাকতি , চিত্ৰ কাকতি , হৰ্ষিতা কাকতি , জীতু , পুলক বৰা, মাধৱ বৰা , ৰূপম বৰা আদি।
অসম নাট্য সন্মিলনৰ দ - পৰ্বতীয়া , প্ৰফুল্ল বৰা শাখাই বৃহত্তৰ দ - পৰ্বতীয়া অঞ্চলত আধুনিক নাট্য আন্দোলন অধিক গতিশীল কৰিব পাৰিব বুলি সকলোৱে আশা প্ৰকাশ কৰে।