২০১৪ ৰ ভিতৰত অসমলৈ অহা হিন্দু, মুছলমান সকলো বৈধ নাগৰিক ! নাগৰিকত্বৰ ভিত্তিবৰ্ষ ১৯৫১ ৰ বিৰোধিতা BDF ৰ...

ডিজিটেল ডেস্কঃ ১৯৫১ ক ভিত্তিবৰ্ষ হিচাপে লৈ কা বাস্তবায়িত কৰিলে বৰাকক বাদ দিব লাগিব। অন্যথা অসমৰ পৰা বৰাক উপত্যকা পৃথক হ'ব। এই হুংকাৰ দিছে বৰাক ডেমক্ৰেটিক ফ্ৰণ্টে।

'ৰাজ্যিক বিজেপিৰ সভাপতি ভৱেশ কলিতা আৰু মুখ্যমন্ত্ৰী ড০ হিমন্ত বিশ্ব শৰ্মাই এন আৰ চি বাতিল কৰা আৰু নাগৰিকত্বৰ বিষয়ত ১৯৫১ ক ভিত্তি বৰ্ষ হিচাপে গঢ়ি তোলাৰ প্ৰস্তাৱক সমৰ্থন কৰিছে। যদি ভৱিষ্যতে এনেধৰণৰ পদক্ষেপ লোৱা হয় তেন্তে বৰাকক ইয়াৰ আওতাৰ পৰা বাদ দিব লাগিব। অন্যথা বৰাক উপত্যকা অসমৰ পৰা পৃথক হ'ব।' এইদৰেই এক প্ৰেছ বিবৃতিৰ জৰিয়তে ভাবুকি প্ৰদান কৰিছে বৰাক ডেমক্ৰেটিক ফ্ৰণ্টে।

আজি এক সংবাদমেল সম্বোধন কৰি বৰাক ডেমক্ৰেটিক ফ্ৰণ্টৰ আহ্বায়ক প্ৰদীপ দত্ত ৰয়ে কয় যে, ৰাজ্যখনত নাগৰিকত্বৰ বিষয়টো মুখ্যতঃ শাসকীয় দল আৰু দিছপুৰৰ অতি-জাতীয়তাবাদী নেতাসকলৰ মস্তিষ্কৰ উদ্ভাৱন। এন আৰ চি তালিকাখনে চকুত আঙুলিৰে দেখুৱাইছে যে, ইয়াৰ কোনো ভিত্তি নাই।

তেওঁ কয়, ইতিমধ্যে প্ৰমাণিত হৈছে যে কিছুমান স্বাৰ্থপৰ জাতীয়তাবাদী অসমৰ নেতাই কোটি কোটি বিদেশী অসমলৈ আহি সকলো গিলিছে বুলি মিছা কথা প্ৰচাৰ কৰি আছিল। এতিয়া এই এন আৰ চি অস্বীকাৰ কৰা হৈছে আৰু ১৯৫১ ক প্ৰতিষ্ঠা বৰ্ষ হিচাপে গঢ়ি তোলাৰ প্ৰস্তাৱ পুনৰ উত্থাপন কৰা হৈছে। আৰু নাগৰিকত্ব সংশোধনী বিধেয়কক কৌশলগতভাৱে ইয়াৰ সৈতে সংযুক্ত কৰা হৈছে। প্ৰদীপ দত্ত ৰয়ে ইয়াৰ আঁৰত ৰাজনীতিৰ গোন্ধ বিচাৰি পাইছে আৰু এয়া সন্দেহৰ বিষয় বুলি দাবী কৰিছে।

তেওঁ কয় যে, বৰাক উপত্যকা আৰু বড়োলেণ্ডত ভাষা আইন যিধৰণে প্ৰয়োগ কৰা হৈছে, একেদৰে ভৱিষ্যতে নাগৰিকত্বৰ বিষয়ত বৰাক উপত্যকাক অসমৰ পৰা বাদ দিব লাগিব। তেওঁ কয় যে, বি ডি এফে বিশ্বাস কৰে যে, হিন্দু আৰু মুছলমান নিৰ্বিশেষে ২০১৪ চনলৈকে অসমলৈ অহা সকলো লোকেই দেশৰ বৈধ নাগৰিক। বৰাকৰ ক্ষেত্ৰত, যদি ইয়াৰ বিপৰীতে কিবা কৰাৰ চেষ্টা কৰা হয়, উপত্যকাটো অসমৰ পৰা পৃথক কৰা হ'ব।

প্ৰদীপ দত্ত ৰয়ে লগতে কয় যে, বিজেপি দলটো বঙালী বিৰোধী। তাত কোনো সন্দেহ নাই। তেওঁ কয়, প্ৰধানমন্ত্ৰীয়ে নিজেই শিলচৰত ঘোষণা কৰিছিল যে, ৰাজ্যখনৰ সকলো ডিটেনচন কেম্প ধ্বংস কৰা হ'ব। কিন্তু তাৰ পিছতো, ডিটেনচন কেম্প বন্ধ কৰা হোৱা নাই। ইয়াৰ বিপৰীতে, ৭০০ কোটি টকা ব্যয়েৰে গোৱালপাৰাত এটা বৃহৎ ডিটেনচন কেম্প নিৰ্মাণ কৰা হৈছে। শেহতীয়াকৈ ৬৮ জন তথাকথিত ঘোষিত বিদেশীক এই কেম্পলৈ স্থানান্তৰিত কৰি নিঃশব্দে মুকলি কৰা হৈছে।

প্ৰধানমন্ত্ৰীয়ে নিজেই কোৱা কথা নিজেই ৰাখিব নোৱাৰিলে বুলি উল্লেখ কৰি প্ৰদীপ দত্ত ৰয়ে কয়, প্ৰধানমন্ত্ৰী নিজেই আহি এই ডিটেনচন কেম্পটো উদ্বোধন কৰক।

ইফালে পূৰ্বৰ বিধায়ক শিলাদিত্য দেৱৰ প্ৰসংগ উল্লেখ কৰি তেওঁ কয়, বিজেপিৰ প্ৰাক্তন বিধায়ক শিলাদিত্য দেৱে শেহতীয়াকৈ কৈছিল নেতাজী সুভাষ চন্দ্ৰ বসু হৈছে আটাইতকৈ ডাঙৰ সন্ত্ৰাসবাদী। যদিও এইটো স্পষ্ট নহয় যে এনে মন্তব্য কি প্ৰসংগত কৰা হৈছিল, তথাপিও বিজেপি নেতাসকলে আকৌ এবাৰ তেওঁলোকৰ জেদ আৰু অযোগ্যতা প্ৰমাণ দাঙি ধৰিলে। এজন বঙালী হিচাপে তেওঁ ইয়াৰ বাবে লজ্জিত।

বিডিএফৰ মিডিয়া চেলৰ মুখ্য আহ্বায়ক জয়দীপ ভট্টাচাৰ্যই সংবাদ মেলখনত কয় যে, কেন্দ্ৰীয় চৰকাৰৰ চাৰি বছৰ পূৰ্বে দুয়োখন সংসদত নাগৰিকত্ব সংশোধনী বিধেয়ক গৃহীত হ'লেও ইয়াৰ নিয়ম প্ৰস্তুত কৰাৰ সাহস নাই। এইটোৱেই প্ৰমাণ কৰে যে এই দলটো বাঙালী হিন্দুসকলৰ স্বাৰ্থৰ বিষয়ে কিমান চিন্তিত।

Also Read: জি-২০ সন্মিলনৰ লগত সংগতি ৰাখি গুৱাহাটী বিশ্ববিদ্যালয়ত আলোচনাচক্ৰ সম্পন্ন...