বৰপেটা জিলাৰ প্ৰতিটো পৰিয়ালৰে দুজনকৈ লোক স্নায়ুজনিত ৰোগত আক্ৰান্ত : ডা০ নোমল চন্দ্ৰ বৰা

ডিজিটেল সংবাদ,বৰপেটা : উচ্চ ৰক্তচাপ,হৃদৰোগ আৰু বৃক্কজনিত ৰোগে বৰপেটা জিলাত ক্ৰমান্বয়ে জটিল ৰূপ ধাৰণ কৰিছে ৷ বৰপেটাত এতিয়ালৈকে ৬ লাখ ৯০ হাজাৰ লোক উচ্চ ৰক্তচাপত আৰু ২ লাখ লোক মধুমেহ ৰোগত আক্ৰান্ত ৷ এক সমীক্ষাৰ উদ্ধৃতি দি দেওবাৰে এই কথা সদৰী কৰে জি এন আৰ চি আৰু ব্যয়সাধ্য স্বাস্থ্য অভিযানৰ প্ৰতিষ্ঠাপক অধ্যক্ষ তথা বিশিষ্ট স্নায়ুৰোগ বিশেষজ্ঞ ডাঃ নোমল চন্দ্ৰ বৰাই ৷

দেওবাৰে বৰপেটা চহৰৰ ৱালডেন ধাবাৰ সভাকক্ষত জি এন আৰ চি কৰ্তৃপক্ষই এখন সংবাদমেলৰ আয়োজন কৰে। এই সংবাদমেলত উপস্থিত থাকি ডা০ বৰাই কয় যে , বৰপেটাত প্ৰতিবছৰে ৮ হাজাৰ লোক ষ্ট্ৰ'ক আৰু হাৰ্ট এটেকত আক্রান্ত হয় ৷

জিলাখনৰ ১ লাখ ৫০ হাজাৰ গৰাকী লোক উচ্চ ৰক্তচাপ আৰু মধুমেহ দুয়োটা ৰোগতে আক্ৰান্ত বুলি তেওঁ জানিবলৈ দিয়ে ৷ ডা০ বৰাই কয় যে , জিলাখনত পথ দুৰ্ঘটনাত হোৱা আঘাতৰ ফলত ২০২১ চনত ১৮০ জন লোকে প্ৰাণ হেৰুৱাইছিল ৷ চিকিৎসা কৰিব পৰা বা প্ৰতিৰোধ কৰিব পৰা স্বাস্থ্য সমস্যাৰ বিষয়ে সজাগতা আৰু মনোযোগৰ অভাৱে অসমৰ বৰপেটা জিলাৰ লোকসকলৰ ওপৰত বিৰূপ প্ৰভাৱ পেলাইছে বুলি তেওঁ মন্তব্য কৰে ৷

জিএনআৰচি হাস্পতালে ৩৬ বছৰ ধৰি মজুত কৰি ৰখা তথ্য আৰু অন্যান্য বিভিন্ন ৰাজহুৱাভাৱে উপলব্ধ উৎসৰ বিশ্লেষণ কৰি সংবাদমেলত ডা০ বৰাই কেতবোৰ গুৰুত্বপূৰ্ণ বক্তব্য আগবঢ়ায় ৷ তেওঁ কয় যে,বায়ু প্রদূষণ, পুষ্টিহীনতা,হৃদয় আৰু ৰক্তনলীৰ ৰোগ আৰু মধুমেহে প্ৰতিবছৰে ভাৰতত স্বাস্থ্যৰ ক্ষেত্ৰত যথেষ্ট ক্ষতি কৰি আহিছে।

সবাতোকৈ বেছি বায়ু প্ৰদূষিত ৰাষ্ট্ৰ হিচাপে ভাৰতবৰ্ষ অন্যতম। এই বায়ু প্ৰদূষণ দেশখনৰ ১০ শতাংশ ৰোগৰ বাবে একমাত্ৰ দায়ী । শ্বাস-প্ৰশ্বাসৰ সমস্যা বৃদ্ধি পোৱাৰো অন্যতম কাৰণ হৈছে বায়ু প্ৰদূষণ।

তদুপৰি এই অস্বাস্থ্যসম্মত খাদ্যাভ্যাসে উচ্চ ৰক্ত শৰ্কৰা, ওজন বৃদ্ধি, উচ্চ ৰক্তচাপ আৰু উচ্চ কলেষ্টেৰলৰ লগত ভাৰতত প্ৰায় ২৫ শতাংশ মুঠ ৰোগৰ বোজাৰ বাবে অৰিহণা যোগায় ৷ এই একেটা আৰু পৰিসংখ্যা বৰপেটাৰ ক্ষেত্ৰতো প্ৰযোজ্য ৷

ডা০ নোমল চন্দ্ৰ বৰাই কয়— 'আমি সকলোৱে জানো যে ‘স্বাস্থ্য হৈছে সম্পদ'। কিন্তু সুস্বাস্থ্যৰ অভাৱৰ ফলত কেৱল জনসংখ্যাৰ শাৰীৰিক ক্ষেত্রতে নহয়, মানসিক, সামাজিক আৰু অৰ্থনৈতিক সুস্থতাৰ ওপৰতো বিৰূপ প্রভাৱ পেলায়। এক স্বাস্থ্যৱান জনসংখ্যাই অৰ্থনীতিত গুৰুত্বপূৰ্ণ অৰিহণা যোগাব পাৰে। সেয়েহে, সমাজৰ সচেতন সদস্য হিচাপে, ‘সকলোৰে বাবে স্বাস্থ্য, সকলোৰে মুখত হাঁহি' মূলমন্ত্ৰৰে অবিৰতভাৱে আগবাঢ়িবলৈ চেষ্টা কৰাটো আমাৰ দায়িত্ব।'

ডাঃ বৰাই লগতে কয় যে, জিএনআৰচিয়ে লক্ষ্যত উপনীত হোৱাৰ বাবে প্ৰতিৰোধমূলক স্বাস্থ্য সেৱা আৰু মানদণ্ড, ব্যয়সাধ্য স্বাস্থ্য সেৱাৰ বিষয়ে ব্যাপক সজাগতাৰ গুৰুত্ব সন্দৰ্ভত ব্যাখ্যা কৰে। এই উদ্দেশ্য জিএনআৰচিয়ে আগষ্ট ২০১৭ত ব্যয়সাধ্য স্বাস্থ্য অভিযান আৰম্ভ কৰিছিল বুলি উল্লেখ কৰি কয় যে , এই অভিযানটোৱে সাম্প্ৰতিক সময়ত অধিক অগ্রগতি লাভ কৰিছে।

জিএনআৰচিয়ে আৰম্ভণিৰ পৰা এই পর্যন্ত বৰপেটাৰ ৭৫,০০০ জন ৰোগীক সেৱা আগবঢ়াবলৈ সক্ষম হৈছে বুলি তেওঁ জানিবলৈ দিয়ে ৷ ইয়াৰ উপৰি প্রথম ২৪ ঘণ্টা বিনামূলীয়া জৰুৰীকালীন আঁচনিৰ অধীনত ৪,৭৬০ জন ৰোগীয়ে বিনামূলীয়া চিকিৎসা লাভ কৰিছে আৰু ১,৯৩৫ জন লোকে বিনামূলীয়া চিটি স্কেনৰ সুবিধা লাভ কৰিছে বুলি ডা০ বৰাই উল্লেখ কৰে ৷

তেওঁ অসম আৰু ভাৰতৰ স্বাস্থ্য সেৱাৰ পৰিস্থিতি উন্নত কৰাৰ বাবে ৰাজ্য আৰু কেন্দ্ৰীয় চৰকাৰে কৰা গুৰুত্বপূৰ্ণ কামৰ প্ৰশংসা কৰে । অভিলাষী চৰকাৰী কাৰ্যসূচী এ বি-পিএম জে এ ৱাই আৰু এ এ-এম এম জে জে ৱাই আঁচনিৰ অধীনত জিলাখনৰ ২,৯৫২ জন লোকে এই পর্যন্ত জিএনআৰচিত চিকিৎসা সেৱা লাভ কৰিছে বুলি তেওঁ উল্লেখ কৰে।

তেওঁ কয় যে,প্রায় ৬০-৭০ শতাংশ ৰোগ প্ৰতিৰোধ কৰিব পাৰি। আগতীয়া ৰোগ নিৰ্ণয় আৰু চিকিৎসাৰ ফলত ৰোগী আৰু পৰিয়ালে উন্নত ফলাফল পোৱাৰ লগতে তেওঁলোকৰ কষ্ট লাঘৱ হয় আৰু অর্থনৈতিক বোজাও হ্রাস পায়।

তেওঁ লগতে কয় যে, ইয়াৰ বাবে স্বাস্থ্য সজাগতা সৃষ্টি কৰাটো অতি গুৰুত্বপূৰ্ণ আৰু জিএনআৰচিয়ে ব্যয়সাধ্য স্বাস্থ্য অভিযানৰ দ্বাৰা সেই লক্ষ্যত উপনীত হ'বলৈ চেষ্টা কৰি আছে। স্বাস্থ্যমিত্ৰসকলে সমাজৰ সকলো শ্ৰেণীৰ লোকৰ মাজত স্বাস্থ্য সজাগতা সৃষ্টিৰ বাবে নিৰন্তৰভাৱে কাম কৰি আছে বুলিও তেওঁ মন্তব্য কৰে ৷

তেওঁ কয় যে,মুখ্যতঃ আমাৰ স্বাস্থ্যমিত্ৰসকলৰ কঠোৰ পৰিশ্ৰম, প্ৰতিশ্ৰুতি, নিষ্ঠা আৰু অধ্যৱসায়ৰ বাবে জিএনআৰচিৰ ব্যয়সাধ্য স্বাস্থ্য অভিযান আজি সফল হৈছে। হাস্পতালৰ পৰা যাবলৈ দিয়াৰ পিচতো স্বাস্থ্য নিৰীক্ষণ আৰু পৰৱৰ্তী প্ৰয়োজনীয় চিকিৎসাৰ সময়তো এই স্বাস্থ্যমিত্ৰসকলে এক গুৰুত্বপূৰ্ণ ভূমিকা পালন কৰে।

তেওঁলোকে ক’ভিড মহামাৰীৰ সময়তো এক গুৰুত্বপূৰ্ণ ভূমিকা পালন কৰিছিল বুলি ডা০ বৰাই মন্তব্য কৰে ৷ ক’ভিডৰ ভাবুকি এতিয়াও শেষ হোৱা নাই বুলি তেওঁ উল্লেখ কৰে।

অদূৰ ভৱিষ্যতে ক'ভিড পুনৰ ঘূৰি আহিব পাৰে বুলি তাৎপৰ্যপুৰ্ণ মন্তব্য কৰে ডা০ নোমল চন্দ্ৰ বৰাই । এইবাৰ পূৰ্বৰ অভিজ্ঞতা আৰু স্বাস্থ্যমিত্ৰসকলৰ দৃষ্টান্তমূলক সহায়ৰ দ্বাৰা ইয়াৰ প্ৰত্যাহ্বানৰ সন্মুখীন হ'বলৈ অধিক প্রস্তুত থাকিম বুলি মন্তব্য কৰে ৷

তেওঁ কয় যে,জি এন আৰ চিৰ স্বাস্থ্যমিত্ৰসকলে এতিয়ালৈকে বৰপেটা জিলাৰ ৫৫,৭৩২ টা পৰিয়ালৰ সমীক্ষা কৰিবলৈ সমৰ্থ হৈছে। এই সমীক্ষাৰ আধাৰতে ১২৩,৭০৬ জন স্নায়ুজনিত ৰোগী, ১৪৪,৩৭১ জন হৃদৰোগী আৰু ১০১,৭৪৬ জন বৃক্কৰোগী চিনাক্ত কৰিবলৈ সমৰ্থ হোৱা বুলি মন্তব্য কৰে।

৫৪৫ জন সক্রিয় স্বাস্থ্যমিত্ৰই জিলাখনৰ ৰাইজক সেৱা আগবঢ়াই আছে আৰু ৫,২৪৫ জনে অসমৰ ৰাইজৰ সুস্বাস্থ্যৰ বাবে কাম কৰি আছে বুলি উল্লেখ কৰে। এই সন্দৰ্ভত ডা০ বৰাই কয় যে,বৰপেটা জিলাৰ পৰা আৰু ১,৫৫০ জন আৰু উত্তৰ-পূব ভাৰতৰ পৰা ১,২০,০০০ জন স্বাস্থ্যমিত্ৰক নিযুক্তি দিয়াৰ পৰিকল্পনা কৰা হৈছে ৷

এই পদক্ষেপে জি এন আৰ চিক পৃথিৱীৰ এই অংশৰ প্ৰতিজন নাগৰিকৰ দুৱাৰমুখলৈ উচ্চ মানদণ্ডৰ স্বাস্থ্য সেৱা কঢ়িয়াই নিয়াত সহায় কৰিব বুলি তেওঁ কয় ৷ ব্যয়সাধ্য স্বাস্থ্য অভিযানক আগবঢ়াই নিয়াৰ ক্ষেত্ৰত সহায়, সমৰ্থন কৰিবলৈ সংবাদ মাধ্যমক অনুৰোধ জনাই ডা০ বৰাই চিকিৎসাৰ অভাব বা প্ৰতিৰোধৰ প্ৰতি অপর্যাপ্ত মনোযোগৰ প্ৰাথমিক কাৰণ হৈছে সজাগতাৰ অভাৱ বুলি মন্তব্য কৰে।

'আজি আধুনিক ঔষধ আৰু সঠিক জীৱনশৈলীৰ জৰিয়তে আগতীয়াকৈ মৃগীৰোগ, ষ্ট্ৰ'ক, ক'ৰনেৰী ধমনী ৰোগ, উচ্চ ৰক্তচাপ আৰু বেছিভাগ আঘাতৰ ঘটনা প্ৰতিৰোধ বা সমাধান কৰিব পাৰি। তথাপিও, সেইবোৰ ঘটে আৰু ইয়াৰ ফলত সমাজৰ বহু লোক মৃত্যুমুখত পৰে বা পংগু হয়। এয়া কেৱল আমাৰ অজ্ঞতাৰ বাবেই হ'বলৈ পায়। কেৱল সংবাদ মাধ্যমে আমাক বৰপেটা জিলাত প্ৰতিৰোধমূলক স্বাস্থ্য সেৱা আৰু প্ৰতিটো পৰিয়াললৈ আগতীয়াকৈ গ্ৰহণ কৰিব লগীয়া সতর্কতামূলক ব্যৱস্থাৰ বাৰ্তাটো লৈ যোৱাত সহায় কৰিব পাৰে আৰু ইয়াৰ দ্বাৰা সমাজ নিৰ্মাণ আৰু ৰাষ্ট্ৰ নিৰ্মাণৰ ক্ষেত্ৰত সেৱা আগবঢ়াব পাৰে।' বুলি ডা০ বৰাই সংবাদমেলত উল্লেখ কৰে।

আজিৰ এই সংবাদমেলত হাস্পতাল কৰ্তৃপক্ষৰ লগতে আন ভালেসংখ্যক লোক উপস্থিত থাকে। লগতে সহযোগিতা আগবঢ়ায়। জিএনআৰচিৰ কাৰ্যবাহী সঞ্চালক শতাব্দী বৰা,স্বাস্থ্যমিত্ৰ প্ৰকল্পৰ মুৰব্বী অভিজিৎ ভট্টাচাৰ্য আৰু জি এন আৰ চি হাস্পতালৰ মাৰ্কেটিং এণ্ড বেণ্ড প্ৰম'চন বিভাগৰ ছিনিয়ৰ মেনেজাৰ মৃণাল আলি হাজৰিকা উপস্থিত থাকে।

Also Read: ফলঙনিত মৰঙী ঐতিহ্য সুৰক্ষা মঞ্চ সমিতিৰ আঞ্চলিক সমিতি গঠন