৫ নৱেম্বৰত কোকৰাঝাৰত উন্মোচিত হ'ব ড° ভূপেন হাজৰিকাৰ পূৰ্ণাৱয়বৰ প্ৰতিমূৰ্তি

ডিজিটেল সংবাদ কোকৰাঝাৰঃ ভাৰতৰত্ন ড° ভূপেন হাজৰিকাৰ চতুৰ্দশ মৃত্যু দিৱস উপলক্ষে কোকৰাঝাৰত অহা ৫ নৱেম্বৰত ড° ভূপেন হাজৰিকাৰ পূৰ্ণাৱয়ব প্ৰতিমূৰ্তি উন্মোচন কৰা হ'ব। ড° ভূপেন হাজৰিকা স্মাৰক সমিতি, কোকৰাঝাৰৰ উদ্যোগত আৰু বিটিচি চৰকাৰৰ পৃষ্ঠপোষকতাত অনুষ্ঠিত হ'বলগীয়া উক্ত কাৰ্যসূচী তিনিদিনীয়া কাৰ্যসূচীৰে ৰূপায়ন কৰা হ'ব ।

আজি ড° ভূপেন হাজৰিকা স্মাৰক ন্যাস সমিতি আৰু ড° ভূপেন হাজৰিকা পূৰ্ণাৱয়ৱ মূৰ্তি উন্মোচন অনুষ্ঠানৰ অভ্যৰ্থনা সমিতিয়ে কোকৰাঝাৰ শাখা সাহিত্য সভা ভৱনত বিয়লি ৫ বজাত যুটীয়াভাৱে আয়োজিত কৰা এক সংবাদমেলত কয় যে ড° ভূপেন হাজৰিকাৰ মৃত্যু দিৱস তিনিদিনীয়া কাৰ্যসূচীৰে ৰূপায়ন কৰিব।

তদুপৰি অহা ৫ নৱেম্বৰত ভাৰতৰত্ন ড° ভূপেন হাজৰিকাৰ পূৰ্ণাৱয়ব প্ৰতিমূৰ্তি উন্মোচন কৰা হ'ব। সেই মৰ্মে অহা তিনি নৱেম্বৰত বুনিয়াদী প্ৰশিক্ষণ কেন্দ্ৰৰ প্ৰেক্ষাগৃহত আন্তঃ বি টি আৰ ভিত্তিক ভূপেন্দ্ৰ সংগীত প্ৰতিযোগিতা, চাৰি নৱেম্বৰত বড়োলেণ্ড বিশ্ববিদ্যালয়ৰ নীলেশ্বৰ ব্ৰহ্ম প্ৰেক্ষাগৃহত "জাতীয় সংহতি নিৰ্মানত ভূপেন হাজৰিকা " শীৰ্ষক আলোচনাচক্ৰ অনুষ্ঠিত হ'ব ।

উক্ত আলোচনাচক্ৰ উদ্বোধন কৰিব বড়োলেণ্ড বিশ্ববিদ্যালয়ৰ উপাচাৰ্য বাবুলাল আহুজা আৰু অনুষ্ঠানটিত উপস্থিত থাকিব গুৱাহাটী বিশ্ববিদ্যালয়ৰ প্ৰাক্তন উপাচাৰ্য অমৰজ্যোতি চৌধুৰী, সদৌ অসম ছাত্ৰ সন্থাৰ মুখ্য উপদেষ্টা ড° সমুজ্জ্বল কুমাৰ ভট্টাচাৰ্য, এবছুৰ সভাপতি দ্বীপেন বড়ো, বড়োলেণ্ড বিশ্ববিদ্যালয়ৰ পঞ্জীয়ক সুবুং বসুমতাৰী আদিকে ধৰি আন বহুতো বিশিষ্ট অতিথিয়ে অংশগ্ৰহণ কৰিব।

আনহাতে ৫ নৱেম্বৰত কোকৰাঝাৰ জিলা আয়ুক্তৰ বাসভৱনৰ সমীপৰ সুধাকণ্ঠ কাননত ড° ভূপেন হাজৰিকাৰ প্ৰতিমূৰ্তি উন্মোচন আৰু মুকলি সভা অনুষ্ঠিত হ'ব। ড° ভূপেন হাজৰিকাৰ প্ৰতিমূৰ্তি আনুষ্ঠানিকভাৱে উন্মোচন কৰিব বিটিচিৰ মুখ্য কাৰ্যবাহী প্ৰমোদ বড়োৱে।

উক্ত অনুষ্ঠানৰ সতে সংগতি ৰাখি "ভূপেন্দ্ৰ বৈভৱ" নামৰ এখন স্মৰণিকা উন্মোচন কৰিব বড়ো সাহিত্য সভাৰ সভাোতি ড° সুৰথ নাৰ্জাৰীয়ে। উক্ত অনুষ্ঠানত অসম সাহিত্য সভাৰ প্ৰাক্তন সভাপতি কুলধৰ শইকীয়া, সাংসদ জয়ন্ত বসুমতাৰী, মন্ত্ৰী উৰ্খাও গৌৰা ব্ৰহ্ম, বিধায়ক লৰেঞ্চ ইছলাৰী, বিশিষ্ট শিল্পী কমল চন্দ্ৰ কটকী উপস্থিত থাকিব। তদুপৰি উক্ত অনুষ্ঠানতে বিশিষ্ট লোকশিল্পী ক্ৰমে বেণুধৰ গয়াৰী, পৰেশ্বৰ চৌধুৰী আৰু কে এ চিৰ প্ৰধান সচিব দিপন বৰ্মনক সম্বৰ্ধনা জনোৱা হ'ব।

উল্লেখ্য যে বিশিষ্ট শিল্পী বীৰেন সিংহই দহ ফুট ছয় ইঞ্চি উচ্চতাৰে নিৰ্মাণ কৰা ড° ভূপেন হাজৰিকাৰ পূৰ্ণাৱয়ব প্ৰতিমূৰ্তি ইতিমধ্যে সুধাকণ্ঠ কাননত প্ৰতিষ্ঠাপন কৰা হৈছে। আজিৰ সংবাদমেলত ড° ভূপেন হাজৰিকা স্মাৰক সমিতিৰ সভাপতি ড° ৰাতুল ডেকা, সম্পাদক ৰাজু বৰ্মন, ড° ভূপেন হাজৰিকা প্ৰতিমূৰ্তি উন্মোচন অনুষ্ঠানৰ সভাপতি অজয় কুমাৰ ব্ৰহ্ম, ভীষ্মেশ্বৰ তালুকদাৰ উপস্থিত থাকি অনুষ্ঠানটি সাফল্যমণ্ডিত কৰি তুলিবলৈ সকলোৰে সহায়-সহযোগিতা কামনা কৰিছে।

Also Read: ৰোজগাৰ মেলা'ত মোডীৰ ৫১,০০০ তকৈ অধিক প্রার্থীক নিযুক্তি পত্ৰ বিতৰণ...