কাজলগাঁৱত কৰ্মৰত মহিলা সম্পৰ্কীয় আইন সন্দৰ্ভত সংবেদনশীলতা সভা

ডিজিটেল সংবাদ, চিৰাং: চিৰাং জিলা আইনী সেৱা প্ৰাধিকৰণৰ উদ্যোগত বৃহস্পতিবাৰে কাজলগাঁৱত "কৰ্মস্থলীত মহিলাক যৌন নিৰ্যাতন"ৰ প্ৰতিৰোধ, নিষেধাজ্ঞা আৰু প্ৰতিকাৰ আইন - ২০১৩ৰ ওপৰত এখন সংবেদনশীলতা সভা অনুষ্ঠিত হয় । জিলাখনৰ বিভিন্ন চৰকাৰী বিভাগৰ মূৰব্বী বিষয়া, কৰ্মচাৰী, অধিবক্তা সকলে অংশগ্ৰহণ কৰা কাজলগাঁৱৰ কৃষি বিজ্ঞান কেন্দ্ৰৰ সভাকক্ষত বন্তি প্ৰজ্বলন কৰি সংবেদনশীল সভাৰ শুভাৰম্ভ কৰে মুখ্য অতিথি বিটিচিৰ উপমুখ্য কাৰ্য্যবাহী সদস্য গোবিন্দ বসুমতাৰী আৰু জিলা আয়ুক্ত পি, ভাস্কৰ ৰেড্ডীয়ে।

সভাৰ আৰম্ভণিতে "কৰ্মস্থলীত মহিলাক যৌন নিৰ্যাতন" ৰ প্ৰতিৰোধ, নিষেধাজ্ঞা আৰু প্ৰতিকাৰ আইন - ২০১৩ৰ বিধানসমূহৰ ওপৰত আলোকপাত কৰি সকলো বিভাগকে যৌন নিৰ্যাতনৰ যিকোনো অভিযোগৰ প্ৰতিকাৰৰ বাবে নিজৰ নিজৰ বিভাগত আভ্যন্তৰীণ অভিযোগ সমিতি গঠন কৰিবলৈ আহ্বান কৰে চিৰাং জিলাৰ সত্ৰ ন্যায়াধীশ আদালতৰ মুখ্য ন্যায়াধীশ শ্ৰী চন্দ্ৰবংশী চতুৰ্বেদীয়ে।

চন্দ্ৰবংশী চতুৰ্বেদীয়ে উল্লেখ কৰে যে, Aureliano Fernandes - Vs- State of Goa and Ors. ৰ গোচৰত ভাৰতৰ মাননীয় উচ্চতম ন্যায়ালয়ৰ আদেশ ২০১৪ চনৰ ২৪৮২ নং দেৱানী আবেদন সন্দৰ্ভত আলোকপাত কৰে। "কৰ্মস্থলীত মহিলাক যৌন নিৰ্যাতন" ৰ প্ৰতিৰোধ, নিষেধাজ্ঞা আৰু প্ৰতিকাৰ আইন - ২০১৩ বিধান সমূহৰ বিষয়ে সদৰি কৰে জিলা সত্ৰ ন্যায়াধীশ আদালতৰ মুখ্য ন্যায়িক দণ্ডাধীশ ডঃ নুপুৰ চন্দ্ৰ ভুঞা, বিজনী অতিৰিক্ত জিলা আৰু সত্ৰ আদালতৰ ন্যায়াধীশ কল্যাণজিত শইকীয়া আৰু দেৱানী আৰু সহকাৰী সত্ৰ ন্যায়াধীশ (জেষ্ঠ্য সংমণ্ডল) জোৎস্না দাসে ।

উক্ত শিতানতে আইনখনৰ কাৰিকৰী দিশসমূহ, আইনখনৰ বিভিন্ন বিধান, যৌন নিৰ্যাতন সম্পৰ্কীয় অভিযোগ গ্ৰহণৰ ধৰণ, অভিযোগৰ সিদ্ধান্ত কেনেদৰে ল'ব লাগে আৰু আভ্যন্তৰীণ অভিযোগ সমিতিৰ দ্বাৰা দিব পৰা বিভিন্ন পৰামৰ্শৰ বিষয়ে আলোচনা কৰা হয়। উক্ত আলোচনাত বিভিন্ন বিভাগৰ বিষয়া, কৰ্মচাৰী সকলে আইন সংক্ৰান্তৰ প্ৰশ্নোত্তৰ শিতানত অংশগ্ৰহণ কৰে।

চিৰাং জিলা আইনী সেৱা প্ৰাধিকৰণৰ উদ্যোগত আয়োজিত সংবেদনশীল সভাত ভাষণ প্ৰসংগত মুখ্য অতিথি তথা বিটিচিৰ উপমুখ্য কাৰ্য্যবাহী সদস্য গোবিন্দ বসুমতাৰীয়ে কয় যে, ভাৰতৰ সংবিধানে পুৰুষ-মহিলাৰ দুয়োকে সমান অধিকাৰ প্ৰদান কৰিছে । তেনেক্ষেত্ৰত যিকোনো চৰকাৰী বা বেচৰকাৰী কৰ্মস্থলীত পুৰুষ বিষয়া কৰ্মচাৰীসকলে যিদৰে কৰ্ম সম্পাদন কৰে ঠিক মহিলা সকলেও একে মৰ্যাদাৰে কাম কৰে। কিন্তু তাৰ মাজতেও বহু কৰ্মস্থলীত পুৰুষ বিষয়া বা কৰ্মচাৰীৰ দ্বাৰা মহিলা বিষয়া বা কৰ্মচাৰী সকলে যৌন নিৰ্যাতনৰ চিকাৰ হোৱাৰ অভিযোগ উত্থাপিত হয়। পুৰুষ সকলে কৰ্মস্থলীত যেতিয়ালৈকে মহিলা সহকৰ্মী সকলৰ প্ৰতি সংবেদনশীল নহ'ব তেতিয়ালৈকে এনেধৰনৰ অপৰাধ সংঘটিত হৈয়ে থাকিব।

এনেধৰনৰ ঘটনা সমূহ প্ৰতিৰোধ কৰি মহিলাসকলক কৰ্মস্থলীত সমান অধিকাৰ প্ৰদান কৰাৰ লক্ষ্যৰেই দেশৰ উচ্চতম ন্যায়ালয়ে আইন প্ৰণয়ন কৰিছে । আজি যিদৰে চৰকাৰী বিভাগৰ বিষয়া, কৰ্মচাৰী সকলক লৈ এই আইন সন্দৰ্ভত অৱগত কৰিবলৈ সংবেদনশীল সভাৰ আয়োজন কৰিছে আগলৈ বেচৰকাৰী অনুষ্ঠানসমূহত এনেধৰনৰ সভা অনুষ্ঠিত কৰিবলৈ সংশ্লিষ্ট বিভাগক আহ্বান জনায় বিটিচিৰ উপমুখ্য কাৰ্য্যবাহী সদস্য গোবিন্দ বসুমতাৰীয়ে।

সভাত জিলা আয়ুক্ত পি, বিজয় ভাস্কৰ ৰেড্ডীয়ে "কৰ্মস্থলীত মহিলাক যৌন নিৰ্যাতন" ৰ প্ৰতিৰোধ, নিষেধাজ্ঞা আৰু প্ৰতিকাৰ আইন - ২০১৩ আইনৰ কথা উল্লেখ কৰি দেশৰ উচ্চতম ন্যায়ালয়ৰ নিৰ্দেশ অনুযায়ী জিলাখনৰ প্ৰতিটো চৰকাৰী বিভাগৰ কাৰ্যালয়ত আভ্যন্তৰীণ অভিযোগ সমিতি গঠন কৰিবলৈ আহ্বান জনায় । এই সংবেদনশীল সভাৰ আঁত ধৰে জিলা আইনী সেৱা প্ৰাধিকৰণৰ সচিব ছৈয়দা ছাবিনা আফজল জিন্নাতে ।

Also Read: বিটিচি প্ৰশাসনৰ উদ্যোগত আন্তৰ্জাতিক শান্তি দিৱস পালন