![বোকাজানত চাহ বাগানৰ মাটি বেদখলমুক্ত কৰাৰ দাবীত ওলাই আহিল চাহবাগানৰ শ্ৰমিক](http://media.assettype.com/asomiyapratidin%2F2024-02%2F88465f54-2175-4db3-aa0e-52004aef495d%2Ffhghfghfg.jpg?w=480&auto=format%2Ccompress&fit=max)
ডিজিটেল সংবাদ, বোকাজানঃ বোকাজানৰ নগালেণ্ড অসমৰ সীমান্তৱৰ্তী নিৰ্মলকুমাৰ টি ষ্টেটৰ ভূমি অবৈধভাবে বেদখল কৰাৰ বিৰুদ্ধে সোমবাৰে ওলাই আহিল শতাধিক চাহ শ্ৰমিক ৷ আটছাৰ নেতৃত্বত ওলাই অহা শ্ৰমিকসকলে বেদখলৰ বিৰুদ্ধে বিভিন্ন শ্লোগানেৰে বোকাজান মহকুমাধিপতিৰ কাৰ্যালয়ৰ সমুখ ভাগ উত্তাল কৰে ৷
সংবাদ মাধ্যমৰ আগত শ্ৰমিক নেতৃত্বই দাবী কৰে যে সন্দেযুক্ত লোকে বাগানৰ মাটি বেদখল কৰি শ্ৰমিকসকলৰ ভৱিষ্যত অন্ধকাৰ কৰি তুলিছে ৷ সেয়েহে প্ৰতিবাদকাৰী সকলে এই বিষয়ত অসমৰ মুখ্যমন্ত্ৰী হিমন্ত বিশ্ব শৰ্মা আৰু কাৰ্বি আংলং স্বায়ত্ত্ব পৰিষদৰ মুখ্যকাৰ্যবাহী সদস্য তুলিৰাম ৰংহাঙৰ হস্তক্ষেপ বিচাৰিছে ৷ অন্যথাই অনিৰ্দিষ্টকালীন ধৰ্ণা কাৰ্যসূচী গ্ৰহণ কৰা হ'ব বুলি স্পষ্ট কৰি দিয়ে নেতৃত্বই ৷
আনহাতে তেওঁলোকে উল্লেখ কৰে যে ১৯৫১ চনৰ ভূমি আইন মতে চাহবাগানৰ মাটি কোনো বাহিৰৰ লোকে বেদখল কৰিব নোৱাৰে ৷ আক্ষেপ কৰি কয় যে চাহ শ্ৰমিকসকলক কাৰ্বি আংলংত ৰাজনৈতিক স্বাৰ্থতহে ব্যৱহাৰ কৰে ৷ ইপিনে শ্ৰমিক নেতৃত্বই উল্লেখ কৰে যে ন্যায়লয়ৰ বিচৰাধীন হৈ থকা অৱস্থাত কেনেকৈ বাহিৰৰ লোকে মাটি বেদখল কৰিব পাৰে ৷ সেয়েহে বাগানৰ পৰা অবৈধ বেদখল মুক্ত কৰাৰ দাবী জনাই বোকাজান মহকুমাৰ মহকুমাধিপতিৰ জৰিয়তে মুখ্যমন্ত্ৰীলৈ স্মাৰকপত্ৰ প্ৰদান কৰে ৷