![মদৰ নিচাত মাতাল শ্ৰম বিষয়া: বিভাগীয় মন্ত্ৰীকেই অসভ্য আচৰণ...](http://media.assettype.com/asomiyapratidin%2F2023-05%2Fffae69af-8203-4cd1-81d1-66193d775635%2Fyyyzz.jpg?w=480&auto=format%2Ccompress&fit=max)
ডিজিটেল সংবাদ, কাজিৰঙা : বোকাখাতৰ শ্ৰম বিষয়া যদুমণি দাসৰ বিৰুদ্ধে উত্থাপন হয় গুৰুতৰ অভিযোগ। বিষয়া গৰাকীয়ে ৰাজ্যৰ শ্ৰমমন্ত্ৰী সঞ্জয় কিষাণৰ সন্মুখত মদ খাই অসভ্য আচৰণ কৰাৰ গুৰুতৰ অভিযোগ উত্থাপন হৈছে৷ ২৩ মে’ত কাজিৰঙাত উপস্থিত হৈছিল ৰাজ্যৰ শ্ৰম তথা জনকল্যাণ মন্ত্ৰী সঞ্জয় কিষাণ ৷
ৰাজ্যৰ চাহ জনজাতি তথা আদিবাসী সমাজৰ ইতিহাস সংৰক্ষিত কৰাৰ বাবে কাজিৰঙাত নিৰ্মাণ হ'বলগীয়া "চাহ কলাক্ষেত্ৰ"ৰ স্থান পৰিদৰ্শন কৰে মন্ত্ৰীগৰাকীয়ে ৷ মন্ত্ৰী কিষাণক বোকাখাতৰ চক্ৰবিষয়া সৌভিক দত্তই চাহ কলাক্ষেত্ৰৰ বাবে আৱণ্টন হোৱা কাজিৰঙাৰ হাতীখুলিৰ প্ৰায় ৩০ বিঘা এলেকা দেখুৱায় ৷ য’ত চাহ জনগোষ্ঠী তথা আদিবাসী সমাজৰ ইতিহাস, সাজপাৰ, পৰম্পৰাগত সা-সঁজুলি, অসমৰ চাহখেতিৰ ইতিহাস, চাহ উৎপাদনৰ পৰম্পৰাগত শৈলী, আৰ্হি ৰূপত চাহ উৎপাদনৰ কাৰখানা বা কলঘৰ স্থাপন কৰাৰ পৰিকল্পনা কৰা হৈছে৷
উক্ত চাহ সংগ্ৰহালয়ে বিশ্বৰ আগত অসমখনৰ চাহ উদ্যোগক আধুনিকতাৰে উপস্থাপন কৰাৰ লগতে ৰাজ্যখনৰ এক অন্যতম কেন্দ্ৰীয় পৰ্যটন ক্ষেত্ৰ ৰূপে পৰিগণিত হ'ব বুলি মন্ত্ৰী কিষাণে মত ব্যক্ত কৰে ৷
কাজিৰঙাত চাহ শ্ৰমিকৰ ৰাইজৰ হিতৰ বাবে ভূমি পৰিদৰ্শন কৰি থকাৰ সময়তে মাতাল অৱস্থাত উক্ত স্থানত উপস্থিত হয় বোকাখাতৰ শ্ৰমবিষয়া যদুমণি দাস ৷ কৰ্তব্যৰ সময়তো মাতাল অৱস্থাত এনে অসভ্য আচৰণ কৰা যদুমণি দাসৰ বিষয়ে মন্ত্ৰী গৰাকীয়ে বিভাগটোৰ শীৰ্ষ বিষয়াক অৱগত কৰে৷
কিন্তু তাৰ পাছতো যদুমণি দাসৰ প্ৰতি ঊৰ্ধ্বতম কৰ্তৃপক্ষৰ কিয় দৰদ তাক লৈ সৰ্বত্ৰে প্ৰশ্ন উত্থাপিত হৈছে ৷ অভিযোগ অনুসৰি, প্ৰায়ে মদৰ নিচাত মাতাল হৈ বহুলোকক অসভ্য আচৰণ কৰে শ্ৰমবিষয়া যদুমণি দাসে৷