![ওদালগুৰিত সদৌ ব্ৰহ্ম ধৰ্ম কমিটিৰ সভা](http://media.assettype.com/asomiyapratidin%2F2024-03%2F66e3468a-d59c-46e6-861f-faf72925362b%2F8.jpg?w=480&auto=format%2Ccompress&fit=max)
ডিজিটেল সংবাদ, হাওৰাঘাটঃ ৰাজ্যখনৰ ওদালগুৰি জিলাৰ ব্ৰহ্ম সমাজৰ ব্ৰহ্ম সেৱাশ্ৰমত দেওবাৰে সদৌ ব্ৰহ্ম ধৰ্ম কমিটি আৰু ব্ৰহ্ম ধৰ্মৰ প্ৰচাৰ সংসদৰ পৃথকে পৃথকে গুৰুত্বপূৰ্ণ সভা অনুষ্ঠিত কৰা হয় । ব্ৰহ্ম ধৰ্মৰ প্ৰচাৰ সংসদৰ মুখ্য প্ৰচাৰক মনোৰঞ্জন ব্ৰহ্মৰ সভাপতিত্বত প্ৰচাৰ সংসদৰ সভাখন অনুষ্ঠিত কৰা হয় ।
সভাৰ উদ্দেশ্য ব্যাখ্যা কৰে প্ৰচাৰ সংসদৰ সচিব বিদ্যাসাগৰ ব্ৰহ্মই । এই সভাত ব্ৰহ্ম ধৰ্মক অসম তথা ভাৰতবৰ্ষত কেনেদৰে প্ৰচাৰ আৰু প্ৰসাৰ জৰিয়তে বিশ্বদৰবাৰত প্ৰতিষ্ঠা লাভ কৰিব পাৰি সেই বিষয়ে বিশদভাৱে আলোচনা কৰা হয় ।
ইপিনে একে সময়তে সদৌ ব্ৰহ্ম ধৰ্ম কমিটিৰ গুৰুত্বপূৰ্ণ কেবিনেট সভা অনুষ্ঠিত কৰা হয় । এই সভাত সভাপতিত্ব কৰে সদৌ ব্ৰহ্ম ধৰ্ম কমিটিৰ সভাপতি অশ্বিনী কুমাৰ স্বৰ্গীয়াৰীয়ে । সভাৰ উদ্দেশ্য ব্যাখ্যা কৰে সম্পাদক জগত ব্ৰহ্মই । এই সভাত কেইবাটাও গুৰুত্বপূৰ্ণ প্ৰস্তাৱ উত্থাপন কৰাৰ লগতে গ্ৰহণ কৰা হয় ।
সভাত Brahma Dharma Coordination Committee ৰ অধ্যক্ষ ড° অজিত বড়ো উপস্থিত থাকি সাৰগৰ্ভ ভাষণ প্ৰদান কৰে । সভাত ৰাজ্যখনৰ গোৱালপাৰা, গোলাঘাট, মৰিগাঁও, শোণিতপুৰ, কোকৰাঝাৰ, কাৰ্বি আংলঙকে ধৰি বহুকেইখন জিলাৰ ব্ৰহ্ম সমাজৰ পুৰোহিত, আচাৰ্য আৰু ভক্ত আইবাবা সকল উপস্থিত থাকে । আগন্তুক সদৌ ব্ৰহ্ম ধৰ্ম কমিটিৰ সোণালী জয়ন্তীৰ লগত সংগতি ৰাখি হ'বলগীয়া সোণালী জয়ন্তীৰ ধৰ্মীয় মুকলি সভাত ভাৰতৰ ৰাষ্ট্ৰপতিক নিমন্ত্ৰণ কৰাৰ বাবে প্ৰস্তাৱ গ্ৰহণ কৰা হয় ।