কন্যাসহ নিৰুদ্দেশ মাতৃ; পৰিয়ালৰ লোকৰ বিশেষ আহ্বান...

ডিজিটেল সংবাদ, চিৰাং : বাসুগাঁও চহৰৰ সমীপৰ ভূটীয়াপাৰাৰ পৰা এটি দুবছৰীয়া কন্যা সন্তানসহ এগৰাকী মাতৃ নিৰুদ্দেশ হোৱাৰ ঘটনা সংঘটিত হৈছে। নিৰুদ্দেশ মাতৃ গৰাকীৰ নাম ৰিয়া দেৱী সৰকাৰ (২৩) । জানিব পৰা মতে, চিৰাং জিলাৰ বাসুগাঁও থানাৰ অন্তৰ্গত ১ নং পাখ্ৰীগুৰী গাঁৱৰ বাসিন্দা পৰিমল সৰকাৰৰ পত্নী ৰিয়া দেৱী সৰকাৰ যোৱা ১৩ জুন মঙ্গলবাৰ দিনা স্বামীৰ সৈতে বাসুগাঁও চহৰৰ সমীপৰ ভুটিয়াপাৰা স্থিত পিতৃ নৱ দেৱনাথৰ বাসগৃহলৈ গৈছিল।

পিতৃ-মাতৃৰ গৃহত দুদিন থকাৰ পিছত ১৫ জুন বৃহস্পতিবাৰ পুৱা আনুমানিক ১০ বজাত ঘৰৰ অইন সদস্য সকলৰ অজ্ঞাতে হালধীয়া ৰঙৰ শাৰী পিন্ধি নিজৰ দুবছৰীয়া কন্যা সন্তান অমৃতাক লৈ নিৰুদ্দেশ হয়। পৰিয়ালৰ লোকে প্ৰথমতে বিষয়টো স্বাভাৱিক বুলি গ্ৰহণ কৰিছিল কিন্তু বিয়লি পৰ্যন্ত ৰিয়াৰ কোনো শুংসূত্ৰ নেপোৱাত পিতৃ মাতৃৰ পৰিয়ালৰ সদস্য সকল চিন্তিত হৈ পৰে।

জোৱায়েক খবৰ দি দুয়োটা পৰিয়ালৰ লোকে নিজাববীয়া অনুসন্ধান চলায়। কিন্তু নিৰুদ্দেশ হোৱা ৰিয়া বা তাইৰ দুবছৰীয়া কন্যা সন্তানৰ কোনো সন্ধান নোপোৱাত বৃহস্পতিবাৰ সন্ধিয়া বাসুগাঁও আৰক্ষী থানা নিৰুদ্দেশ সম্পৰ্কীয় এখন এজাহাৰ দাখিল কৰে । কোনো সদাশয় লোকে যদি এই নিৰুদ্দেশ মাতৃ ৰিয়া দেৱী সৰকাৰ আৰু কন্যা অমৃতা সৰকাৰৰ কোনো সন্ধান লাভ কৰে, তেন্তে নিকটতম আৰক্ষী থানা নাইবা ৬০০২২৪০৭৬৫ ম'বাইল নম্বৰত যোগাযোগ কৰিবলৈ পৰিয়ালৰ লোকে আহ্বান জনাইছে ।

Also Read: নিষিদ্ধ মন্ত্ৰী অতুল বৰা; বৃহৎ গণ সমাৱেশেৰে কেতবোৰ দাবীৰে গণ স্বাক্ষৰ...