মঙলদৈত অসমীয়া ছবি 'নটসূৰ্য'ৰ শুভ মহুৰত

ডিজিটেল সংবাদ,‌মঙলদৈ : মঙলদৈত অসমীয়া ছবি 'নটসূৰ্য'ৰ শুভ মহুৰত অনুষ্ঠানৰ আয়োজন কৰা হয়। অসমৰ অপেছাদাৰী নাট্য গোষ্ঠী জেংৰাই অসমৰ নিবেদন,নাট্যকাৰ,পৰিচালক বিশ্বজিৎ ডেকা আৰু টিম জেংৰাইৰ পৰিচালনাৰে পূৰ্ণদৈৰ্ঘৰ অসমীয়া ছবি "নটসূৰ্য The Untold Story"ৰ বৃহস্পতিবাৰে মঙলদৈ মহাবিদ্যালয় বিজ্ঞান ভৱনত শুভ মহুৰত অনুষ্ঠান অনুষ্ঠিত কৰা হয়।

জেংৰাই অসমৰ নাট্য কৰ্মী ৰাকেশ ডেকাই আঁত ধৰা অনুষ্ঠানত কেমেৰাত মাল্যাৰ্পণ কৰে মীন উন্নয়ন নিগমৰ অধ্যক্ষ গুৰুজোতি দাসে। নাৰিকল ভাঙি শুভমহুৰত কৰে সমাজসেৱক তথা মঙলদৈ মহাবিদ্যালয়ৰ অধ্যক্ষ ড০ কমলাকান্ত বৰাই।

বন্তি প্ৰজ্বলন কৰে ক্ৰমে বিশিষ্ট পৰিচালক তথা অৰণ্য বোলছবিৰ পৰিচালক সমেৰেন্দ্ৰ নাৰায়ণ দেৱ, নাট্যকাৰ, গীতিকাৰ,অভিনেতা হেমন্ত দত্ত আৰু বিশিষ্ট চিকিৎসক,সু- সাহিত্যক ড০ অমৰেন্দ্ৰ নাৰায়ণ দেৱে । অনুষ্ঠানত নীল চহৰীয়া, অভিনেত্ৰী তথা মঙলদৈৰ পৌৰপতি নিৰ্মালি দেৱী শৰ্মা, ৰাষ্ট্ৰীয় খ্যাতিসম্পন্ন নাট্যকাৰ দয়াল কৃষ্ণ নাথকে ধৰি বহু বিশিষ্ট ব্যক্তিয়ে অংশগ্ৰহণ কৰে।

ছবিখনৰ চিত্ৰগ্ৰহণ কৰিব মুম্বাইৰ প্ৰতিষ্ঠিত চিত্ৰগ্ৰহণ কাৰী সঞ্জয় কুমাৰ সিং আৰু ছবিখন সংগীতেৰে সজাব অহিৰ ভৈৰৱে। পৰিচালকে জনোৱা মতে ছবিখনৰ অভিনয়ত থাকিব যতীন খনিকৰ,চাজু আহমেদ,সত্যেন শৰ্মা,নিৰ্মল দাস,তপন ডেকা,কুমাৰেশ দত্ত,নিনামণি কলিতা,দীপাংকৰ ভূঞা,ডলী চক্ৰৱৰ্তী, নিৰ্মালি দেৱী শৰ্মা, মহেন্দ্ৰ ডেকা, মন্টু কুমাৰ দাস আদি।

ছবিখনৰ মুখ্য সহকাৰী পৰিচালক হিচাপে থাকিব বিশিষ্ট কৰিঅ'গ্ৰাফাৰ ৰাজু দাস।ৰাইজৰ পৰা সংগৃহীত ধনেৰে নিৰ্মাণ হ'ব লগা ছবিখনত আৰু বহু ন- পুৰণি অভিনেতা, অভিনেত্ৰীৰ সমাহাৰ ঘটিব ।

ইতিমধ্যে জেংৰাই অসমৰ নাট্য গোষ্ঠীয়ে অসমৰ নাট্য জগতত নাট্য আন্দোলন গঢ়ি তুলিবলৈ সক্ষম হৈছে । অসমৰ লগতে ভাৰতৰ বিভিন্ন ঠাইত নাট মঞ্চস্থ কৰি পুৰস্কাৰ লাভ কৰিবলৈ সক্ষম হোৱা জেংৰাই অসমৰ এই প্ৰচেষ্টাৰ বাবে সকলোৱে শুভেচ্ছা জনাইছে ।

Also Read: নগাঁৱত কংগ্ৰেছৰ প্ৰশিক্ষণ শিবিৰ আৰু যোগদান সমাৰোহ