প্ৰদেশ কংগ্ৰেছৰ প্ৰাক্তন সম্পাদক সুশীল পেগুৰ দেহাৱসান...

ডিজিটেল সংবাদ,চিলাপথাৰঃ চিলাপথাৰ আকাজন নিবাসী অসম চৰকাৰৰ প্ৰাক্তন ৰাজহ মন্ত্ৰী গোমেশ্বৰ পেগুৰ পুত্ৰ সুশীল পেগুৰ আজি নিজ বাসভৱনত মৃত্যু হয়। এবছৰে জটিল ৰোগত আক্ৰান্ত হৈ থকা পেগুৱে ৫৪ বছৰ বসয়ত শেষ নিশ্বাস ত্যাগ কৰে।

বিভিন্ন হাস্পতালত চিকিৎসা কৰাইও কোনো সুফল নোপোৱাত নিজা ঘৰতে বিশ্ৰাম লৈ আছিল। অৱশেষত আজি দুপৰীয়া প্ৰায় ২:৩০ বজাত অকাজানস্থিত নিজ গৃহত তেওঁৰ পৰলোকপ্ৰাপ্তি ঘটে। মৃত্যুৰ সময়ত তেওঁ পত্নী, একমাত্ৰ কন্যা সহ বহু নিকট আত্মীয়ক ইহলোকত এৰি থৈ গৈছে।

উল্লেখ্য যে অকাজান জনজাতি হাইস্কুলৰ পৰা মেট্ৰিক উত্তীৰ্ণ হৈ গুৱাহাটীতে উচ্চতৰ মাধ্যমিক আৰু আৰ্য বিদ্যাপীঠৰ পৰা বুৰঞ্জীত স্নাতক ডিগ্ৰী লাভ কৰা সুশীল পেগুৱে ছাত্ৰ অৱস্থাৰ পৰাই ৰাজনীতিত জৰিত হৈ পৰিছিল। কংগ্ৰেছ দলৰ বিভিন্ন বিষয়বাবত কাৰ্য্য নিৰ্বাহ কৰি এসময়ত প্ৰদেশ যুৱ কংগ্ৰেছৰ সম্পাদকৰ পদবীত কাৰ্য্যনিৰ্বাহ কৰিছিল।

মিছিং স্বায়ত্ব শাসিত পৰিষদৰ উজনি চিচি টঙানি সমষ্টিৰ পৰা নিৰ্বাচনত অৱতীৰ্ণ হৈছিল পেগু। পৰৱৰ্তী সময়ত তেওঁ জোনাই বিধানসভা সমষ্টিটো কংগ্ৰেছ দলৰ পৰা প্রতিদ্বন্দীতা আগবঢ়াইছিল। শেহতীয়াকৈ তেওঁ বিজেপি দলটো যোগদান কৰিছিল। তেওঁৰ অকাল মৃত্যুত অঞ্চলটোত গভীৰ শোকৰ ছাঁ পৰিছে। বিভিন্ন দল সংগঠনে গভীৰ শোক প্ৰকাশ কৰি বিদেহী আত্মাৰ সদগতি কামনা কৰিছে।