বিলাসীপাৰাত শূন্যলৈ গুলীচালনা কৰি পলায়ন কৰা দুষ্কৃতিকাৰীক আটক

ডিজিটেল সংবাদ,ধুবুৰী : শনিবাৰে দোকমোকালি পুৱা প্ৰায় ৪-৩০ বজাত বিলাসীপাৰা মহকুমাৰ শশাৰগাঁৱ প্ৰথম খণ্ডত এদল দুষ্কৃতিকাৰীয়ে গাঁৱখনৰ এজন যুৱকক অতৰ্কিত আক্ৰমণ কৰাৰ লগতে শূন্যলৈ গুলীচালনা কৰি সন্ত্ৰাসৰ সৃষ্টি কৰিছিল। এই ঘটনাৰে জড়িত ৭ গৰাকী দুষ্কৃতিকাৰীক দেওবাৰে আৰক্ষীয়ে আটক কৰিবলৈ সক্ষম হয়।

উল্লেখ্য যে উক্ত ঘটনাৰ দিনৰে পৰা জিলাখনৰ আৰক্ষী অধীক্ষক নৱীন সিং শশাৰগাঁৱত উপস্থিত হৈ পৰিস্থিতিৰ বুজ লোৱাৰ লগতে গুৰুতৰভাৱে আহত নন্দন নাথৰ ঘৰখনত উপস্থিত তেঁওৰ স্বাস্থ্যৰ বুজ লয়। লগতে যুৱকজনৰ লগত হোৱা ঘটনাৰ তদন্ত আৰম্ভ কৰে।

গোটেই নিশা ধৰি জিলাখনৰ আৰক্ষী অধীক্ষকৰ নিৰ্দেশত ধুুবুৰী আৰক্ষী আৰু বঙাইগাঁৱ আৰক্ষীৰ দলে চাপৰ,শালমাৰা আৰু যোগীঘোপাৰ পৰা ৭গৰাকী দুষ্কৃতিকাৰীক আটক কৰিবলৈ সক্ষম হয়। আটকাধীন কেউগৰাকীৰ নাম ক্ৰমে চাপৰৰ নুৰমহম্মদ আলী(২২),সাহাবুদ্দিন(২৩),মহম্মদ আলী(৩৮),ৰফিকুল,ৰিয়াজুল ওৰফে  পংকু,কোকৰাঝাৰ জিলাৰ অলৰভুই গাৱঁৰ মেহেবুব আলম আৰু চাপৰৰ ধীৰঘাটৰ হামিদল ইছলাম বুলি আৰক্ষী অধীক্ষগৰাকীয়ে জানিবলৈ দিয়ে ।

আৰক্ষীৰ এই অভিযানত ৭ ধৃত কেইজনৰ পৰা এখন মটৰ চাইকেল,নম্বৰৰ প্লেটবিহীন এখন চাৰিচকীয়া বেলেনো গাড়ী আৰু ২জাঁই সজীৱ গুলী  আৰু বহু আপত্তিজনক সামগ্ৰী জব্দ কৰে। আৰক্ষীয়ে আটকাধীন ধৃত কেইজনক থানাত অধিক তথ্যৰ বাবে সোধা-পোছা চলাই আছে।

Also Read: জাপানীজ এনকেফেলাইটিজত আক্ৰান্ত হৈ ছাত্ৰীৰ মৃত্যু