ডিজিটেল সংবাদ, ডিব্ৰুগড়ঃ অসমত লেখক যিমান ওলাইছে সমালোচকৰ সংখ্যা তাতকৈ কম। ফলত বহু ভাল গ্ৰন্থ সমালোচনা নোহোৱাকৈ থাকি গৈছে। সমালোচনা নোহোৱাৰ বাবে ভাল গ্ৰন্থবোৰৰ খবৰ পাঠকৰ ওচৰ নাপায়গৈ- এই মন্তব্য বিশিষ্ট সাহিত্যিক ড০ নগেন শইকীয়াৰ। মঙলবাৰে ডিব্ৰুগড় বিশ্ববিদ্যালয়ৰ প্ৰকাশন শাখাই আয়োজন কৰা এক অনুষ্ঠানত এই মত প্ৰকাশ কৰে প্ৰতিথযশা সাহিত্যিক ড° নগেন শইকীয়াই।
প্ৰকাশন শাখাই প্ৰকাশ কৰা বিশিষ্ট সমালোচক ড° আনন্দ বৰমুদৈৰ 'আধুনিক অসমীয়া সাহিত্যৰ ইতিহাস' শীৰ্ষক গ্ৰন্থখন উন্মোচন কৰি ড° শইকীয়াই লগতে কয় যে সাহিত্য সমালোচনা সদায় সৃষ্টিশীল হ'ব লাগে, ধ্বংসাত্মক হ'ব নালাগে। নিজৰ বক্তব্যত তেওঁ ড° বৰমুদৈৰ কিতাপখনৰ উচ্চ প্ৰশংসা কৰে।
২৬ ডিচেম্বৰৰ বিয়লি ৩.০০ বজাৰপৰা বিশ্ববিদ্যালয়ৰ ভোজৰাজ শেঠ সভাঘৰত অনুষ্ঠিত হোৱা অনুষ্ঠানটিত প্ৰকাশন শাখাই প্ৰকাশ কৰা মুঠ চাৰিখন গ্ৰন্থ উন্মোচিত হয়। বিশিষ্ট ভূতত্ত্ববিদ ড° যোগেন্দ্ৰনাথ শৰ্মাৰদ্বাৰা সম্পাদিত আৰু অসমৰ ঊনৈশগৰাকী বিশিষ্ট লেখকৰ লেখাৰে সমৃদ্ধ আঠশৰো অধিক পৃষ্ঠাৰ 'বিজ্ঞানৰ ইতিহাস' শীৰ্ষক গ্ৰন্থখন উন্মোচন কৰে বিশ্ববিদ্যালয়ৰ ভাৰপ্ৰাপ্ত উপাচাৰ্য তথা বুৰঞ্জীবিদ ড° জাহ্নবী গগৈয়ে।
ডিব্ৰুগড় বিশ্ববিদ্যালয় পদাৰ্থবিজ্ঞানৰ সহকাৰী অধ্যাপক তথা লেখক ড° প্ৰবালজ্যোতি ফুকনে প্ৰণয়ন কৰা 'সৰ্বসমীক্ষা তত্ত্ব' শীৰ্ষক গ্ৰন্থখন উন্মোচন কৰে বিশিষ্ট বিজ্ঞানী তথা জনবোধ্য বিজ্ঞান লেখক ড° পৰমানন্দ মহন্তই। গুৱাহাটী বিশ্ববিদ্যালয়ৰ অৱসৰী অধ্যাপক ড° বাৰীন্দ্ৰকুমাৰ শৰ্মাই প্ৰণয়ন কৰা 'শ্ৰীনিবাস ৰামানুজন' শীৰ্ষক গ্ৰন্থখন উন্মোচন কৰে বিশিষ্ট গণিতজ্ঞ ড° গোপালচন্দ্ৰ হাজৰিকাই।
বিশ্ববিদ্যালয়ৰ প্ৰকাশন বিষয়া প্ৰকল্প ৰঞ্জন ভাগৱতীয়ে আঁত ধৰা অনুষ্ঠানটিৰ আদৰণি ভাষণ আগবঢ়ায় ড° যোগেন্দ্ৰনাথ শৰ্মাই। অনুষ্ঠানটিত বিশিষ্ট লেখক ড° পল্লৱী ডেকা বুজৰবৰুৱা, লেখক-অনুবাদক ড° কল্যাণ ভূঞা, লেখক ক্ৰমে ড° টিকেন্দ্ৰজিৎ গগৈ, ড° তাপস কুমাৰ গোস্বামী, ড° প্ৰবালজ্যোতি ফুকন আৰু ড° বুলুমণি কলিতায়ো বক্তব্য ৰাখে। প্ৰকাশন বিষয়া ভাগৱতীয়ে অনুষ্ঠানটিৰ আৰম্ভণিতে উদ্দেশ্য ব্যাখ্যা কৰাৰ লগতে অনুষ্ঠানৰ শেষত শলাগৰ শৰায়ো আগবঢ়ায়।