বোকাখাতত ড৹ ভীমৰাও আম্বেদকাৰৰ ১৩২ তম জন্ম জয়ন্তী উদযাপন

ডিজিটেল সংবাদ,বোকাখাতঃ আজি দেশৰ সংবিধান প্ৰণেতা ভাৰতৰত্ন ড০ ভীমৰাও আম্বেদকাৰৰ ১৩২ তম জন্ম জয়ন্তী। এই উপলক্ষে দেশৰ বিভিন্ন প্ৰান্তৰ লগতে বোকাখাততো শুকুৰবাৰে মহকুমা জাতি কল্যাণ ব'ৰ্ডৰ উদ্যোগত তথা অনুসূচীত জাতি সমন্বয়ৰক্ষী উন্নয়ন সমিতি আৰু অনুসূচীত জাতি পৰিষদ বোকাখাত জিলা সমিতিৰ সহযোগত ড০ ভীমৰাও আম্বেদকাৰৰ ১৩২তম জন্ম জয়ন্তী উদযাপন কৰা হয়।

বোকাখাতৰ ড০ আম্বেদকাৰ ভৱনত আয়োজিত এই জন্ম জয়ন্তী উপলক্ষে আম্বেদকাৰৰ প্ৰতিমূৰ্তিত মাল্য আৰু বন্তি প্ৰজ্বলনেৰে শ্ৰদ্ধাঞ্জলি জ্ঞাপন কৰাৰ লগতে বৃক্ষ ৰোপন ,মুকলি সভা আদি কেইবাটাও কাৰ্যসূচী পালন কৰা হয়।

অনুষ্ঠানটিত উপস্থিত থাকে অনুসূচীত জাতি জনকল্যাণ ব'ৰ্ডৰ অধ্যক্ষ প্ৰহ্লাদ দাসৰ লগতে অসম গণ পৰিষদৰ বোকাখাত বিধান পৰিষদৰ সভাপতি জগত চন্দ্ৰ কলিতা,বিশিষ্ট সমাজ কৰ্মী প্ৰদীপ দাস,শিক্ষক ভৰত ৰবিদাসৰ লগতে অনুসূচীত জাতি জনকল্যাণ ব'ৰ্ডৰ উপাধ্যক্ষ প্ৰশান্ত দাস আৰু অনুসূচীত জাতি সমন্বয়ৰক্ষী উন্নয়ন সমিতিৰ সাধাৰণ সম্পাদক মনোজ দাসৰ উপৰিও কেইবা গৰাকীও গণ্যমান্য ব্যক্তি তথা সদস্য সদস্যাসকল।

Also Read: কোকৰাঝাৰ মেডিকেল কলেজ আৰু চিকিৎসালয় উদ্বোধন প্ৰধানমন্ত্ৰীৰ