ধূপধৰাত খাদ্যত বিষক্ৰিয়াঃ অৰ্ধ শতাধিক পুৰুষ মহিলা অসুস্থ

ডিজিটেল সংবাদ, ধূপধৰাঃ ধূপধৰা থানাৰ অধীনৰ কোঠাকুঠিৰ নিকটৱৰ্ত্তী মৰিয়মপুৰত বুধবাৰে খাদ্যত বিষক্ৰিয়া হৈ ৫০ৰো অধিক লোক অসুস্থ হৈ চিকিৎসাধীন হ'বলগীয়া হয় ৷ ইয়াৰে কেবাজনৰো অৱস্থা সংকটজনক বুলি জানিব পৰা গৈছে ৷

জানিব পৰা মতে ধূপধৰাৰ সমীপৰ অসম- মেঘালয় সীমান্তৱৰ্তী মৰিয়মপুৰ গাঁৱত আজি দুপৰীয়া বিনচেং মাৰাক নামৰ গাৰো সম্প্ৰদায়ৰ লোকজনৰ প্ৰয়াত শাহুয়েকৰ  প্ৰাৰ্থনাৰ উদ্দেশ্যে এক অনুষ্ঠানৰ আয়োজন কৰি তেওঁৰ ঘৰত এক ভোজৰ আয়োজন কৰে ৷ উক্ত অনুষ্ঠান আৰু ভোজত গাঁৱখনৰ প্ৰায় ২ শতাধিক লোকে অংশগ্ৰহণ কৰে ৷

দুপৰীয়া ভোজত খাদ্য গ্ৰহণ কৰাৰ পিচতে সন্ধিয়া বহুতো লোক অসুস্থ হৈ পৰে আৰু গাঁৱখনত হুৱাদুৱা লাগে ৷ এই ঘটনাৰ পিচতে ধূপধৰা আৰক্ষী ঘটনাস্থলীত উপস্থিত হৈ অসুস্থ হৈ পৰা লোকসকলক ধূপধৰাৰ বিকালী আদৰ্শ চিকিৎসালয় আৰু ৰংজুলিত চিকিৎসাৰ ব্যৱস্থা কৰে ৷

বৰ্তমানে ধূপধৰাৰ বিকালী আদৰ্শ চিকিৎসালয়ত ৩০ৰো অধিক পুৰুষ-মহিলা চিকিৎসাধীন হৈ আছে ৷ ইয়াৰে দুজনৰ অৱস্থা সংকটজনক হোৱা বাবে গোৱাপাৰালৈ প্ৰেৰণ কৰা হৈছে বুলি জানিবলৈ দিয়ে ৷

অৱশ্যে অসুস্থ হোৱা লোকৰ সংখ্যা বৃদ্ধি পোৱাৰ সম্ভাৱনা আছে ৷ একাংশ স্থানীয় লোকে জনোৱা অনুসৰি ভোজত চালানী মাছৰ ব্যৱস্থা আছিল আৰু সেই মাছ খায়েই লোকসকল অসুস্থ হ'ব পাৰে বুলি সন্দেহ কৰিছে।

Also Read: টিহুৰ বালিত গিৰিধৰ শৰ্মাক স্মৰণ নলবাৰী জিলা সাহিত্য সভাৰ