বি বৰুৱা কেঞ্চাৰ প্ৰতিষ্ঠানত অস্থি মজ্জা সংৰোপণ গোটৰ আধাৰশিলা স্থাপন…

ডিজিটেল ডেস্কঃ গুৱাহাটীৰ বি বৰুৱা কেঞ্চাৰ প্ৰতিষ্ঠানত ১৬ আগষ্ট, মঙ্গলবাৰে নতুনকৈ চাৰিখন বিচনাযুক্ত অস্থি মজ্জা সংৰোপণ (বি এম টি) গোটৰ আধাৰশিলা স্থাপন কৰা হয়। এই আধাৰশিলা স্থাপন কৰে কৰ্কট প্ৰতিষ্ঠানখনৰ সঞ্চালক ড০ অমল চন্দ্ৰ কটকীয়ে।

এইছ ডি এফ চি বেংকৰ কৰ্প'ৰেট সামাজিক দায়বদ্ধতা শাখাৰ এইছ টি পাৰেখ ফাউণ্ডেশ্যনে আগবঢ়াইছে এই চাৰিন বিচনাযুক্ত অস্থি মজ্জা সংৰোপণ গোট। অনুষ্ঠানত চিকিৎসক, নাৰ্ছ, চিকিৎসা সমাজকৰ্মী আৰু বি এম টি দলৰ টেকনিচিয়ানসহ ২০ জন সদস্যক সম্বৰ্ধনাও জনোৱা হয়। ইয়াৰ উপৰিও অসম এইছ ডি এফ চিৰ ব্যৱসায়িক মূৰব্বী সুনদীপ বাজাজক সম্বৰ্ধনা জনোৱা হয়।

বি বৰুৱা কৰ্কট সঞ্চালক ডাঃ অমল চন্দ্ৰ কটকীৰ মতে, হেমাটো লিম্ফইড কৰ্কট ৰোগ ৰক্ষা আৰু লগতে এপ্লাষ্টিক ৰক্তহীনতাৰ দৰে কৰ্কট ৰোগ নোহোৱা স্থিতিৰ বাবে হাড়ৰ মজ্জা সংৰোপণ হৈছে এক গুৰুত্বপূৰ্ণ থেৰাপিউটিক সঁজুলি। ভাৰতত, ২০২০ চনত প্ৰায় ৯০ হাজাৰ হেমাটো-লিম্ফইড কৰ্কট ৰোগ হোৱাৰ খবৰ পোৱা গৈছিল।

উত্তৰ-পূব ভাৰতত প্ৰতি বছৰে হেমাটো-লিম্ফইড কৰ্কট ৰোগত আক্ৰান্ত হোৱা প্ৰায় ৭ হাজাৰ ৰোগী চিনাক্ত হয়। তেওঁ কৰ্কট প্ৰতিষ্ঠানখনৰ নতুন বি এম টি ৱাৰ্ড সম্পূৰ্ণ হোৱাৰ পিছতেই এই প্ৰক্ৰিয়াটোৰ বাবে অপেক্ষাৰ সময় হ্ৰাস কৰিব বুলি উল্লেখ কৰি কয়- ই প্ৰতি বছৰে সংৰোপণৰ সংখ্যা বৃদ্ধি কৰিব আৰু সংৰোপণৰ ব্যয়ো হ্ৰাস কৰিব।

আনহাতে অনুষ্ঠানত মেডিকেল অংক'লজী বিভাগৰ হেমাটো লিম্ফইড বিভাগৰ সহকাৰী অধ্যাপক ডাঃ আচিফ ইকবালে কয়- আজিলৈকে ৬ জন ৰোগীয়ে একাধিক মাইলোমা, পুনৰুত্থান লিম্ফোমাৰ পৰা এপ্লাষ্টিক ৰক্তহীনতালৈকে চিকিৎসাজনিত স্থিতিৰ সৈতে বি বৰুৱা কৰ্কট প্ৰতিষ্ঠানত সফলতাৰে বি এম টি সম্পন্ন কৰিছিল। সাধাৰণতে, ভাৰতৰ যিকোনো স্থানৰ চৰকাৰী চিকিৎসালয়ত বি এম টিৰ ব্যয় ১৫ ৰ পৰা ২০ লাখ টকাৰ ভিতৰত হয়। অৱশ্যে, বি বৰুৱা কৰ্কট প্ৰতিষ্ঠানত কৰা সকলো বি এম টিৰ ব্যয় ৭ লাখ টকাৰ ভিতৰত।

ইফালে কৰ্কট প্ৰতিষ্ঠানখনত বি এম টি সফলতাৰে পৰিচালনা কৰাৰ বাবে সমগ্ৰ দলটোৰ ভূমিকাৰ প্ৰশংসা কৰি চিকিৎসা অংক'লজীৰ মুৰব্বী অধ্যাপক ড০ মুনলিমা নাৰায়ণাই কয় যে, নতুন বি এম টি গোটটো বহু লোকৰ সামূহিক প্ৰচেষ্টাৰ ফল। প্ৰতিষ্ঠানখনত প্ৰথম বি এম টি সম্পাদন কৰাৰ পিছৰে পৰা কৰ্কট প্ৰতিষ্ঠানখনৰ সঞ্চালক ডাঃ অমল চন্দ্ৰ কাকটিৰ সমৰ্থন অতুলনীয় ।

অনুষ্ঠানত প্ৰতিষ্ঠাখনৰ উপ-সঞ্চালক (প্ৰশাসক) ড০ বি বি বৰঠাকুৰ, উপ-সঞ্চালক (গৱেষণা) ড০ মৌচুমি ভট্টাচাৰ্য আৰু উপ-সঞ্চালক (শিক্ষাবিদ) ড০ ডি বৰ্মন এই অনুষ্ঠানত উপস্থিত থাকে।