![কম্বল বিক্ৰেতাৰ বেশত প্ৰবঞ্চক](http://media.assettype.com/asomiyapratidin%2F2023-03%2Fa787d8e5-2be5-4633-806c-1d34d1e0ca63%2Fnew_sir.jpg?w=480&auto=format%2Ccompress&fit=max)
ডিজিটেল সংবাদ, গোলাঘাট : গোলাঘাট জিলাৰ বিভিন্ন গ্ৰামাঞ্চল আৰু বাগিচা অঞ্চলৰ সহজ-সৰল লোক এতিয়া লক্ষ্য হৈ পৰিছে কেতবোৰ প্ৰবঞ্চকৰ ৷ মঙ্গলবাৰে সহজতে ঋণ দিয়াৰ নামত বাগিচাৰ শ্ৰমিকৰ পৰা টকা সংগ্ৰহ কৰা অবস্থাতে ৰাইজে আবদ্ধ কৰিলে এনে এজন প্ৰবঞ্চকক ৷
খুমটাইৰ তেলিশাল বাগিচাত সংঘটিত হৈছে এই ঘটনা ৷ জানিব পৰা অনুসৰি, প্ৰবঞ্চকজন প্ৰথমে কম্বল বিক্ৰী কৰি বাগিচাৰ লোকসকলৰ সৈতে চিনাকি হয় ৷ তাৰ পিছত ঋণ দিয়াৰ আভুৱা ভাৰি টকা সংগ্ৰহ আৰম্ভ কৰে ৷
মধ্যপ্ৰদেশৰ প্ৰবীণ চাৰণ নামৰ এই লোকজনে নিজাববীয়াকৈ তেলিশাল বাগিচাৰ শ্ৰমিকসকলক ২০হাজাৰ টকাকৈ লোণ দিয়াৰ নামত সংগ্ৰহ কৰিছিল ১৫০০ কৈ টকা ৷ ইতিমধ্যে কেইবাজনো ব্যক্তিৰ পৰা লোণৰ নামত সংগ্ৰহ কৰিছিল টকাখিনি ৷
টকা সংগ্ৰহ কৰি থকা অৱস্থাতে বাগিচাৰ সচেতনৰ লোকৰ সন্দেহ ওপজাত আৰক্ষীৰ লগত যোগাযোগ কৰে ৷ তাৰপিছতেই বাগিচাৰ লোকসকলে প্ৰবঞ্চকজনক আবদ্ধ কৰি ৰাখে ৷
এনেকৈয়ে লোণ দিয়াৰ নামত বহু ঠাইত প্ৰবঞ্চকটোৱে সংগ্ৰহ কৰিছে টকা ৷ প্ৰবঞ্চকটোক আবদ্ধ কৰাৰ পিছত লোকে লোকাৰণ্য হৈ পৰে তেলিশাল ৷ শেষত গোলাঘাট আৰক্ষী উপস্থিত হৈ প্ৰবঞ্চকটোক আটক কৰে ৷