ডিজিটেল সংবাদ গোলাঘাটঃ গোলাঘাট জিলাৰ সৰুপথাৰৰ নাওজানত এফালৰ পৰা মূল্যবান গছ কাটি তহিলং কৰিছে একাংশ দুষ্টচক্ৰই ৷ শনিবাৰে পুৱা নাওজান ৰেলবিভাগৰ মাটিত থকা মূল্যবান গছ কাটিবলৈ নাওজানৰে দিগন্ত পাঠক নামৰ এজন লোকৰ নেতৃত্বত এটা দলে চেষ্টা চলাওতেই একাংশ সচেতন লোকে বনবিভাগক খবৰ দিয়ে ৷
উল্লেখযোগ্য যে, নাওজান বনাঞ্চলিক বিষয়াৰ কাৰ্যালয়ৰ পৰা মাত্ৰ কিছু নিলগতে উক্ত মূল্যবান গছ কটা সম্পৰ্কে জনাই নাছিল বনবিভাগ । যি বিষয়ক কেন্দ্ৰ কৰি তীব্ৰ প্ৰতিক্ৰিয়াৰ সৃষ্টি হৈছে ৷
এই ঘটনাৰ খবৰ পোৱাৰ পিচত উক্ত মূল্যবান গছ বনবিভাগে জব্দ কৰিছে যদিও উক্ত ঘটনাক কেন্দ্ৰ কৰি বনবিভাগ, আৰক্ষী আৰু ৰেলবিভাগৰ মাজত হাহাকাৰ লাগিছে ৷ ইতিমধ্যে নাওজান বনবিভাগে দিগন্ত পাঠকৰ বিৰুদ্ধে নাওজান আৰক্ষীৰ ওচৰত এক এজাহাৰ দাখিল কৰিছে ৷
আনহাতে, বৰ্তমানলৈকে এজনো অভিযুক্তক নাওজান আৰক্ষীয়ে আটক কৰিব নোৱাৰা বিষয়টোৱে সমগ্ৰ ঘটনাক ৰহস্যৰ সৃষ্টি কৰিছে ৷ ইফালে, মূল্যবান গছ কটাৰ আৰঁৰ মূল অভিযুক্ত দিগন্ত পাঠকক এই পৰ্য্যন্ত আটক কৰিব নোৱাৰাত অভিযুক্ত পাঠকক ৰক্ষণাবেক্ষণ দিয়াৰো অভিযোগ উঠিছে ৷
উল্লেখযোগ্য যে, এই নাওজান বনাঞ্চলিক বিষয়াৰ অন্তৰ্গত মহিমা গাঁৱত বিকাট' চিচি নামৰ এজন নগালোকে অবৈধভাৱে এটা কাঠৰমিল চলাই থকাৰ অভিযোগো দীৰ্ঘদিনীয়া ৷ কেৱল ইমানেই নহয় নাওজানৰ পৰাই দীৰ্ঘদিনধৰি চুবুৰীয়া ৰাজ্য নাগালেণ্ডলৈ অবৈধভাৱে কাঠৰ চোৰাং বেহা চলাই আহিছে একাংশ দুষ্টচক্ৰই।
