ডিজিটেল সংবাদ,কাজিৰঙা : নিজ সমষ্টিতে কৃষকৰ প্ৰত্যাহ্বানৰ সন্মুখীন বিধায়ক তথা কৃষি মন্ত্ৰী অতুল বৰা ৷ বোকাখাত সমষ্টিত কৃষকসকল উপকৃত হ'ব পৰাকৈ কাম নকৰাৰ অভিযোগ অতুল বৰা বিৰুদ্ধে ৷
কৃষি মন্ত্ৰীৰ সমষ্টিত একাংশ কৃষকৰ মাজত হাহাকাৰৰ সৃষ্টি হৈছে । বানপানীয়ে জুৰুলা কৰা, শুৰপোকৰ অত্যাচাৰৰ পাছত এতিয়া পথাৰত পানী নথকাৰ ফলত চিৰাল ফাঁট মেলিছে ৷ উল্লেখযোগ্য যে ধানৰ গেৰ ধৰা সময়তে খেতিপথাৰৰ এনে অৱস্থাই বিমোৰত পেলাইছে কৃষকসকলক।
যি সময়ত আত্মনিৰ্ভৰশীল ভাৰত,পথাৰ আমাৰ- বজাৰ আমাৰ ইত্যাদি শ্লগান দিয়া হৈছে, সেই সময়তে কৃষি মন্ত্ৰীৰ নিজৰ সমষ্টিতে হতাশ হৈ পৰিছে কৃষকসকল ৷ পূৱ কাজিৰঙা গাওঁ পঞ্চায়তৰ অন্তৰ্গত জাপৰিপথাৰৰ ৯০% লোক কৃষিৰ ওপৰতে নিৰ্ভৰশীল ৷
কিন্তু এতিয়া কৃষিকাৰ্য্য কৰি হতাশ হ'বলগীয়া হৈছে দুৰ্ভগীয়া কৃষকসকল । গাঁৱখনৰ ৰাইজে কৃষি, জলসিঞ্চন বিভাগ কাৰো পৰা একোৱে সুবিধা লাভ কৰা নাই বুলি আক্ষেপ প্ৰকাশ কৰে ৷
মন কৰিবলগীয়া যে প্ৰধানমন্ত্ৰীৰ কৃষক সন্মান নিধিৰ তালিকাৰ পৰাও কৰ্তন কৰা হৈছে কৃষকসকলৰ নাম ৷ বানপানীয়ে নষ্ট কৰা কৃষিকাৰ্য্যৰো আজিলৈকে নহ'ল ক্ষতিপূৰণৰ ব্যৱস্থা ৷
সততে কৃষি বিভাগৰ আঁচনিৰ সফল ৰূপায়নৰ কথা কৈ থকা অতুল বৰাক সমষ্টিবাসীৰ প্ৰত্যাহ্বান যে বোকাখাত সমষ্টিৰ ডিফলুপথাৰৰ ৰাইজক কৃষি বিভাগৰ তৰফৰ পৰা দিয়া আঁচনি ৰাজহুৱা কৰক ৷
