কৃত্ৰিম বানপানীৰ প্ৰতিযোগিতা! এইবাৰ এজাক বৰষুণতে বুৰিল গোলাঘাট চহৰ...

ডিজিটেল সংবাদ, গোলাঘাট : দেওবাৰৰ নিশা অহা এজাক ধাৰাষাৰ বৰষুণৰ পাছতে সোমবাৰে জলমগ্ন গোলাঘাট চহৰৰ কেইবাটাও ৱাৰ্ডৰ বাট-পথ তথা বাসভৱন। কৃত্ৰিম বানপানীত বুৰ যোৱা চহৰখনৰ ১, ৩ আৰু ৪ নং ৱাৰ্ডত ভয়াৱহ ৰূপ ধাৰণ কৰে।

এই কৃত্ৰিম বানপানীৰ ভয়াৱহ ৰূপত বাসিন্দাসকলৰ লগতে পথাচাৰীয়ে সন্মুখীন হয় সমস্যাৰ। চহৰৰ হিন্দী স্কুল ৰোড, ন-পুৰ, তপন নগৰ, এৰেঙ্গাপাৰা আদি অঞ্চলৰ বাট-পথ পানীৰ তলত ডুব যোৱাৰ ফলত ছাত্র-ছাত্ৰী অথবা পথাচাৰীয়ে দুৰ্ভোগ ভুগিব লগীয়া হয়। উল্লেখ্য যে, প্ৰয়োজনীয় নলা নৰ্দমা নোহোৱাৰ বাবেই বৰষুণৰ পানীয়ে যেনি তেনি বৈ গৈ বাট-পথ সমূহ বুৰাই পেলায়।

মন কৰিব লগীয়া কথা চৰকাৰে গোলাঘাট চহৰৰ উন্নয়নৰ বাবে মঞ্জুৰ কৰা এশকোটি টকাৰে চহৰখনৰ বাট-পথ সমূহ আৰু নলা-নৰ্দমা নিৰ্মাণৰ কাম-কাজ চলি আছে যদিও এনে বোৰ কাম কাজ কৰোতে উপযুক্ত পৰিকল্পনা আৰু বিজ্ঞানসন্মত ধাৰণাক গুৰুত্ব নিদিয়াৰ বাবেই এই নলা-নৰ্দমাবোৰে সঠিক ভাৱে পানী নিষ্কাষণ কৰাত ব্যৰ্থ হৈছে। ইয়াৰ ফলত কোটি কোটি চৰকাৰী টকা পানীত পৰাৰহে পৰিলক্ষিত হৈছে।

Also Read: পথত গাঁত দেখিলেই লখিমপুৰবাসীয়ে খবৰ দিয়ক ৬০০০১ ৮৮৬২৮ নম্বৰত...