ডিজিটেল সংবাদ,গোলাঘাট: বীৰচক্ৰ কেপ্টেইন জিন্টু গগৈৰ শুকুৰবাৰে ২৪ সংখ্যক মৃত্যু দিৱস । কাৰ্গিল যুদ্ধত বীৰদৰ্পে জপিয়াই পৰি দেশৰ বাবে প্ৰাণ আহুতি দিয়া বীৰ শ্বহীদ গৰাকীক সোঁৱৰিছে সমগ্ৰ দেশে । শ্বহীদ গৰাকীৰ মৃত্যু তিথিৰ দিনা খুমটাইস্থিত জিন্টু গগৈৰ সমাধি ক্ষেত্ৰত শ্ৰদ্ধাঞ্জলি জনাই স্মৰণ কৰিলে পিতৃ-মাতৃ আৰু পৰিয়ালৰ লোকে ।
সমগ্ৰ দেশৰ বাবে প্ৰাণ বিসৰ্জন দিয়া শ্বহীদ গৰাকীৰ সমাধিলৈ আহিবলৈ আহৰি নাপালে ৰজাঘৰৰ কোনো এজন লোকে । প্ৰশাসনৰ পৰা নূন্যতম সঁহাৰিও নাপাই আক্ষেপ প্ৰকাশ কৰিছে শ্বহীদ গৰাকীৰ পিতৃ-মাতৃয়ে । কেমেৰাৰ সন্মুখতে উচুপি উঠিলে শ্বহীদ গৰাকীৰ মাতৃয়ে । দেশৰ বাবে প্ৰাণ আহুতি দিয়া বীৰচক্ৰ কেপ্তেইন জিন্টু গগৈক শ্ৰদ্ধাঞ্জলি জনাবলৈ মনত নপৰিল জিলা প্ৰশাসন তথা জনপ্ৰতিনিধিৰ । কেপ্টেইন গৰাকীৰ মৃত্যুৰ ২৪টা বছৰ পাৰ কৰা পিছত আজিকোপতি চৰকাৰৰ দ্বাৰা লোৱা নহ'ল কোনো এটাও পদক্ষেপ ।
