![কাজিৰঙাৰ হাতী পাথৰ গণেশ মন্দিৰত গণেশ পূজাৰ আয়োজন](http://media.assettype.com/asomiyapratidin%2F2024-02%2Fda08bb50-ccfb-44ad-982e-77a773c61d67%2F6.jpg?w=480&auto=format%2Ccompress&fit=max)
ডিজিটেল সংবাদ,কাজিৰঙাঃ আজি গণেশ পূজা ৷ হিন্দু ধৰ্মৰ প্ৰচলিত প্ৰথানুসৰি পবিত্ৰ প্ৰথা মতে মঙ্গলবাৰে গণেশ পূজাৰ দিনা ভক্তই পূজা অৰ্চনা আৰম্ভ কৰিছে গণেশ দেৱতাৰ ৷
একে পৰম্পৰা ৰক্ষা কৰি কাজিৰঙাৰ হাতী পাথৰ গণেশ মন্দিৰতো আয়োজন কৰা হৈছে গণেশ পূজাৰ ৷ জনশ্ৰুতিৰ মতে স্বৰ্গদেউ গদাধৰ সিংহৰ স্মৃতি বিজড়িত কাৰ্বি পাহাৰৰ নামনিত হাতীৰ আকৃতিৰ শিলাখণ্ডই শিল্পীৰ হাতৰ পৰশত ৰূপ পাইছিল গণেশ দেৱতাৰ ৷
কালক্ৰমত মাটিৰে অৰ্ধেক ঢাকি ধৰা গণেশৰ মূৰ্তি জনা দৃষ্টিগোচৰ হয় সেই স্থানত ১৯৬৫ চন মানত নতুনকৈ বসতি স্থাপন কৰা কাৰ্বি জনগোষ্ঠীৰ লোক সকলৰ ৷ পাছলৈ অৱসৰ প্ৰাপ্ত সেনাবাহিনীৰ এজন লোকে স্থাপন কৰে মন্দিৰটো ৷ তেতিয়াৰ পৰা হাতী পাথৰ গণেশ মন্দিৰত চলি আহিছে পূজা অৰ্চনা ৷ ইফালে এই মন্দিৰটোৰ সতে কাজিৰঙা ৰাষ্ট্ৰীয় উদ্যানৰ আছে এক গভীৰ সম্পৰ্ক ৷