বোকাখাতৰ জ্যেষ্ঠ সাংবাদিক নীলু আচাৰ্যলৈ "অইল-ডিপিচি মিডিয়া বঁটা ২০২৩"

ডিজিটেল সংবাদ,বোকাখাত : বোকাখাতৰ জ্যেষ্ঠ সাংবাদিক,দৈনিক জনমভূমি কাকতৰ বোকাখাতৰ প্ৰতিবেদক তথা বোকাখাত মহকুমা সাংবাদিক সন্থাৰ সম্পাদক নীলু আচাৰ্যলৈ 'অইল-ডিপিচি মেডিয়া বঁটা'-২০২৩ আগবঢ়োৱা হৈছে ৷ ১৬ নৱেম্বৰত দুলীয়াজান প্ৰেছ ক্লাবৰ উদ্যোগত আৰু অইল ইণ্ডিয়াৰ সহযোগত দুলীয়াজানৰ বিহুতলীত আয়োজিত ৰাষ্ট্ৰীয় প্ৰেছ দিৱসৰ কাৰ্যসূচীত দুলীয়াজান প্ৰেছ ক্লাবে নীলু আচাৰ্যক এই অইল-ডিপিচি মেডিয়া বঁটা-২০২৩ প্ৰদান কৰিব ৷

উল্লেখ্য যে, আচাৰ্যই ১৯৯০ চনত দৈনিক জনমভূমি কাকতত ফটো সাংবাদিক হিচাবে সাংবাদিকতাৰ জীৱন আৰম্ভ কৰিছিল। তেওঁক জনমভূমি গ্ৰুপ্ৰে ২০০৫ চনত কনক চন্দ্ৰ শৰ্মা সোঁৱৰণী শ্ৰেষ্ঠ সাংবাদিকতাৰ বঁটা প্ৰদান কৰিছিল।

ইয়াৰোপৰি তেওঁ কাজিৰঙা নিউজ নেটৱৰ্কৰ শ্ৰেষ্ঠ সাংবাদিকতাৰ বঁটাও লাভ কৰিছিল ৷ সাংবাদিক আচাৰ্য বোকাখাত মহকুমাৰ কুৰুৱাবাহী তিনিআলিৰ নিৱাসী। সাংবাদিকতাৰ উপৰি বোকাখাতৰ বিভিন্ন দল সংগঠন আৰু অনুষ্ঠান প্ৰতিষ্ঠানৰ সৈতে তেওঁ জড়িত ৷

সাংবাদিক নীলু আচাৰ্য এগৰাকী ফটোগ্ৰাফাৰ আৰু সুদক্ষ ফুটবল খেলুৱৈ হিচাবেও পৰিচিত ৷ সাংবাদিকগৰাকীয়ে দুলীয়াজান প্ৰেছ ক্লাবৰ অইল-ডিপিচি মেডিয়া বঁটা-২০২৩ বঁটা লাভ কৰাৰ বাবে বোকাখাত প্ৰেছ ক্লাব, বোকাখাত মহকুমা সাংবাদিক সন্থা, বোকাখাতৰ ইলেক্ট্ৰনিকচ মেডিয়া জাৰ্নেলিষ্ট এচ'চিয়েচন চমুকৈ ইমজা, কাজিৰঙা নিউজ নেটৱৰ্কৰ লগতে বিভিন্ন দল সংগঠনে শুভেচ্ছা জ্ঞাপন কৰে ৷

Also Read: নিৰ্বাচন আয়োগে প্ৰিয়ংকা গান্ধী আৰু আপৰ বিৰুদ্ধে জাৰি কৰিলে কাৰণ দৰ্শোৱাৰ জাননী....