কাজিৰঙাৰ গজ মহোৎসৱকলৈ যুদ্ধকালীন প্ৰস্তুতি...

ডিজিটেল সংবাদ, কাজিৰঙাঃ নেৰানেপেৰা বৰষুণৰ মাজত যুদ্ধকালীন তৎপৰতাৰে কাজিৰঙাত চলিছে গজ মহোৎসৱৰ প্ৰস্তুতি । উল্লেখযোগ্য যে ১৯৯২ চনত আৰম্ভ হোৱা হস্তী প্ৰকল্পৰ ৩০ বছৰীয়া বৰ্ষপূৰ্তি উপলক্ষে অহা ৭ আৰু ৮ এপ্ৰিলত কাজিৰঙাত অনুষ্ঠিত হ’ব গজ মহোৎসৱ ৷ গজ মহোৎসৱৰ কাৰ্যসূচীত অংশগ্ৰহণ কৰিব ৰাষ্ট্ৰপতি দ্ৰুপদী মুৰ্মুৱে ৷

৬ এপ্ৰিলত কাজিৰঙাত উপস্থিত হৈ ৭ এপ্ৰিলত গজ মহোৎসৱৰ প্ৰথম দিনাৰ কাৰ্যসূচীত অংশ ল’ব ৰাষ্ট্ৰপতি গৰাকীয়ে ৷ ৰাজ্য চৰকাৰৰ উদ্যোগত আয়োজন কৰা গজ মহোৎসৱ অনুষ্ঠিত কৰাৰ বাবে কহঁৰা আৰু বাগৰিত চলি থকা প্ৰস্তুতিৰ বুজ লয় বনমন্ত্ৰী চন্দ্ৰমোহন পাটোৱাৰী, কৃষি মন্ত্ৰী অতুল বৰাৰ লগতে বিত্ত মন্ত্ৰী অজন্তা নেওগে ৷

এই সন্দৰ্ভত সাংবাদিকৰ আগত মন্ত্ৰী অতুল বৰাই প্ৰকাশ কৰে যে প্ৰাক্তন ৰাষ্ট্ৰপতি নীলম সঞ্জীৱ ৰেড্ডী, ৰামনাথ কোবিন্দৰ পাছত তৃতীয় গৰাকী ৰাষ্ট্ৰপতি আহিব কাজিৰঙালৈ ৷ ইয়াৰ পূৰ্বে লোক সভাৰ অধ্যক্ষকে ধৰি কেইবাগৰাকীও গণ্যমান্য ব্যক্তি কাজিৰঙালৈ আহিছে ৷ তদুপৰি কাজিৰঙাত অনুষ্ঠিত চিন্তন বৈঠকত দুগৰাকী আধ্যাত্মিক নেতাও উপস্থিত আছিল ।

যাৰ পৰিপেক্ষিতত কাজিৰঙাৰ পৰ্যটনে অধিক প্ৰসাৰতা লাভ কৰিবলৈ সক্ষম হৈছে ৷ আনহাতে ৰাষ্ট্ৰপতিৰ কাজিৰঙা ভ্ৰমনৰ সন্দৰ্ভত বনমন্ত্ৰী চন্দ্ৰমোহন পাটোৱাৰীয়ে প্ৰকাশ কৰে যে ৰাষ্ট্ৰপতি গৰাকীয়ে গজ মহোৎসৱৰ কাৰ্যসূচীত অংশগ্ৰহণ কৰাৰ লগতে অসমৰ থলুৱা সংস্কৃতিৰ কাৰ্যসূচী উপভোগ কৰিব ৷ ইয়াৰোপৰি কাজিৰঙা ৰাষ্ট্ৰীয় উদ্যান দৰ্শন কৰিব ৰাষ্ট্ৰপতি গৰাকীয়ে ৷আনহাতে বাগৰি বনাঞ্চল এলেকাত হস্তী বিষয়ক এখন প্ৰদৰ্শনীৰো আয়োজন কৰিছে ৰাষ্ট্ৰীয় উদ্যান কৰ্তৃপক্ষই ৷

Also Read: আজি অসমলৈ আহিব দিল্লীৰ মুখ্যমন্ত্ৰী অৰবিন্দ কেজৰিৱাল...