নিৰ্বাচনী বতৰতে বিশ্বনাথৰ কংগ্ৰেছ নেতাৰ ব্যৱসায়িক কেন্দ্ৰত GST আয়ুক্তলয়ৰ তালাচী

ডিজিটেল সংবাদ বিহালীঃ বিশ্বনাথ চাৰিআলিৰ অন্যতম প্ৰতিষ্ঠিত ব্যৱসায়ী তথা বিশ্বনাথৰ প্ৰভাৱশালী কংগ্ৰেছ নেতা বিক্ৰম ডুবেৰ ব্যৱসায়িক কেন্দ্ৰত আজি প্ৰায় ৬ ঘণ্টা ধৰি জি এছ টি আয়ুক্তালয়ে তালাচী চলোৱাৰ খবৰে সমগ্ৰ জিলাখনতে চাঞ্চল্য সৃষ্টি কৰিছে। বিহালী উপ নিৰ্বাচনৰ সময়তে বিশ্বনাথৰ প্ৰতিষ্ঠিত ব্যৱসায়ী তথা কংগ্ৰেছ নেতা বিক্ৰম ডুবেৰ ব্যৱসায়িক কেন্দ্ৰত ৰাজ্যিক সামগ্ৰী-সেৱা কৰ বিভাগে কৰ ফাঁকিৰ অভিযোগত চলোৱা এই অভিযান তাৎপৰ্যপূৰ্ণ বিষয় হিচাপে বিবেচিত হৈছে৷

জানিব পৰা মতে, ৰাজ্যিক সামগ্ৰী-সেৱা কৰ আয়ুক্তালয়ৰ এটা ২৫ জনীয়া দলে বিশ্বনাথ চাৰিআলি মাতা হাৰ্ডৱেৰ নামৰ ব্যৱসায়িক প্ৰতিষ্ঠানৰ কৰ ফাঁকিৰ খবৰৰ ভিত্তিত অভিযান চলোৱা বুলি অভিযানকাৰী বিষয়াৰ পৰা জানিব পৰা গৈছে৷ ৰাজ্যিক কৰ আয়ুক্তৰ নিৰ্দেশত বিশ্বনাথ চাৰিআলিৰ মাজমজিয়াত অৱস্থিত মাতা হাৰ্ডৱেৰ নামৰ ব্যৱসায়িক প্ৰতিষ্ঠানত এই অভিযানকাৰী দলটোৱে তদন্ত কৰিছে৷

মাতা হাৰ্ডৱেৰ নামৰ ব্যৱসায়িক প্ৰতিষ্ঠানত ৰাজ্যিক সামগ্ৰী-সেৱা কৰ আয়ুক্তলয়ৰ ২৫ জনীয়া অভিযানকাৰী দলটোৱে ব্যৱসায়িক নথি-পত্ৰ পৰীক্ষা নিৰীক্ষা চলাই বহুকেইটা ইলেক্ট্ৰনিক ডিভাইছ, নথি-পত্ৰ জব্দ কৰে বুলি অভিযানকাৰী দলটোৱে সদৰি কৰিছে৷

উল্লেখ যে বিশ্বনাথ চাৰিআলিৰ মাজমজিয়াত অৱস্থিত মাতা হাৰ্ডৱেৰৰ স্বতাধিকাৰী বিক্ৰম ডুবেৰ ব্যৱসায়িক প্ৰতিষ্ঠানত কিছু দিন পূৰ্বে সামগ্ৰী-সেৱা কৰ বিভাগৰ তেজপুৰ আৰু বিশ্বনাথ চাৰিআলি শাখাই আন এক অভিযান চলাইছিল৷ পুনৰ আজি ৰাজ্যিক সামগ্ৰী সেৱা কৰ আয়ুক্তালয়ৰ ২৫ জনীয়া অভিযানকাৰী দলে ব্যৱসায়িক প্ৰতিষ্ঠানখনত অভিযান চলালে৷

উল্লেখ যে, অহা ১৩ নবেম্বৰ তাৰিখে অনুষ্ঠিতৱ্য বিহালী উপ-নিৰ্বাচনত বিহালীৰ কংগ্ৰেছ প্ৰাৰ্থী জয়ন্ত বৰাৰ হৈ নিৰ্বাচনী প্ৰচাৰ কাৰ্যত সক্ৰিয় ভূমিকা গ্ৰহণ কৰিছে বিক্ৰম ডুবেই৷

Also Read: AIUDF ৰ দক্ষিণ শালমাৰা মানকাচৰ জিলা কমিটী নতুনকৈ গঠন...