![কাকপথাৰত আৰক্ষীৰ এনকাউণ্টাৰত গুলীবিদ্ধ ড্ৰাগছ সৰবৰাহকাৰী…](http://media.assettype.com/asomiyapratidin%2Fimport%2Fwebsite%2F2022%2F09%2Fkakapathar-drugs.jpg?w=480&auto=format%2Ccompress&fit=max)
ডিজিটেল সংবাদ, তিনিচুকীয়াঃ শণিবাৰে বিয়লি তিনিচুকীয়া জিলাৰ কাকপথাৰ এলেকাৰ লাজুম গাঁৱত ড্ৰাগছ সৰবৰাহকাৰীক লক্ষ্য কৰি আৰক্ষীয়ে গুলীচালনা কৰাত জিন্তু মৰাণ নামৰ এগৰাকী ড্ৰাগছ সৰবৰাহকাৰী আৰক্ষীৰ গুলীত আহত হয় । বিশেষ সূত্ৰৰ পম খেদি আৰক্ষীয়ে চলোৱা এই অভিযানত আন তিনি জন সৰবৰাহকাৰী পলায়ন কৰা বুলি আৰক্ষীয়ে জানিবলৈ দিয়ে ।
অভিযানকাৰী দলটোৱে ঘটনাস্থলীৰ পৰা বুজন পৰিমাণৰ সন্দেহজনক ব্ৰাউন চুগাৰ জব্দ কৰে । ড্ৰাগছখিনিৰ মূল্য কেইবা লক্ষাধিক হ'ব বুলি আৰক্ষীয়ে সদৰি কৰিছে । আৰক্ষীৰ গুলীচালনাত সোঁ ভৰিত গুলী লাগি আহত হোৱা জিন্তু মৰাণক প্ৰথমে কাকপথাৰ প্ৰাথমিক স্বাস্থ্য কেন্দ্ৰত চিকিৎসা কৰি পিছলৈ উন্নত চিকিৎসাৰ বাবে তিনিচুকীয়া অসামৰিক চিকিৎসালয়ত ভৰ্তি কৰোৱা হয় ।
জিন্তু মৰাণৰ ঘৰ টঙনা থানা এলেকাৰ হাতীগড়ত বুলি জনা যায় । ইফালে ঘটনাস্থলীত তিনিচুকীয়াৰ উপ-আৰক্ষী অধীক্ষক হিৰণ্য কুমাৰ বৰা সহিতে এটা বৃহৎ আৰক্ষী, কমাণ্ডো আৰু বীৰাংগণাৰ দলে তিনি পলাতক সৰবৰহকাৰীৰ সন্ধানত নামি পৰিছে । তিনিচুকীয়াৰ উপ-আৰক্ষী অধীক্ষক (প্ৰবেছনাৰ) পাৰ্থ প্ৰতীক দুৱৰাৰ নেতৃত্বত এই সফল অভিযান চলোৱা বুলি জানিব পৰা গৈছে ।