গৰৈমাৰীত অগ্নিকাণ্ডঃ প্ৰাণ গ'ল মূকবধিৰ দুই ভাতৃৰ...

ডিজিটেল ডেস্কঃ কামৰূপৰ গৰৈমাৰীৰ জাহিৰপুৰত চাঞ্চল্যকৰ ঘটনাই জোকাঁৰি হৈছে সমগ্ৰ ৰাজ্যক।  ঘৰত জুই লাগি একেলগে প্ৰাণ গ'ল দুই ভাতৃৰ৷ প্ৰাপ্ত খবৰ অনুসৰি,  পুৱতি নিশা ২ বজাত সংঘটিত হৈছিল অগ্নিকাণ্ডৰ ঘটনা৷

অগ্নিদগ্ধ হৈ মৃত্যু হোৱা যুৱক দুজন সাজন আলী (২০) আনজন সমেজ আলী (২২)৷গুৰুতৰভাৱে আহত হৈছে যুৱক দুজনৰ মাতৃ আঞ্জুৱাৰা বেগম৷বৈদ্যুতিত শ্বৰ্ট চাৰ্কিটৰ ফলত অগ্নিৰকাণ্ড সংঘটিত হোৱাৰ সন্দেহ স্থানীয় ৰাইজৰ৷

জাহিৰপুৰ গাঁৱৰ বাহাদুৰ আলীৰ ঘৰত সংঘটিত হৈছে এই মৰ্মান্তিক ঘটনা৷ ঘটনা সংঘটিত হোৱা কেইবাঘন্টাৰ পাছত অগ্নিনিৰ্বাপক বাহিনীয়ে নিৰ্বাপন কৰে জুই৷  ঘটনাস্থলীত গৰৈমাৰী আৰক্ষী উপস্থিত হৈ উদ্ধাৰ কৰিছে দুই যুৱকৰ মৃতদেহ৷

মৃত যুৱক দুজনৰ মৃতদেহ মৰণোত্তৰ পৰীক্ষাৰ বাবে জি এম চি এইচলৈ প্ৰেৰণ কৰিছে গৰৈমাৰী আৰক্ষীয়ে৷ আহত আঞ্জুৱাৰা বেগমক ভৰ্তি কৰোৱা হৈছে চিকিৎসালয়ত৷

উল্লেখ্য যে, অতি দৰিদ্ৰ বাহাদুৰ আলীৰ মাত্ৰ এটাই চৰকাৰী ঘৰ আছিল৷ এটা ঘৰতে বসবাস কৰিছিল চাৰিজনীয়া পৰিয়ালটো৷ মৃত যুৱক দুজন আছিল মূকবধিৰ। ঘটনাক কেন্দ্ৰ কৰি সমগ্ৰ অঞ্চলতে তীব্ৰ চাঞ্চল্যৰ সৃষ্টি হৈছে৷