![পশ্চিম কাৰ্বি আংলংঙৰ বৈঠালাংছ'ত কৃষকৰ মাজত এদিনীয়া প্ৰশিক্ষণ শিবিৰ সম্পন্ন...](http://media.assettype.com/asomiyapratidin%2F2024-05%2F1290671d-10d1-49e3-87c1-84aa2ed2225e%2FHAORA_16.jpg?w=480&auto=format%2Ccompress&fit=max)
ডিজিটেল সংবাদ হাওৰাঘাটঃ পশ্চিম কাৰ্বি আংলং জিলাৰ খেতিয়কসকলক খেতি কৰাৰ সুবিধা প্ৰদানৰ উদ্দেশ্য বৈঠালাংছ'ৰ সহকাৰী কৃষি বিভাগৰ উদ্যোগত দিনজোৰা কাৰ্য্যসূচীৰে খেতিয়ক সকলক প্ৰশিক্ষণ প্ৰদান কৰা হয় ৷ প্ৰশিক্ষণত উপস্থিত থকা সমল ব্যক্তি তথা কৃষি বিভাগৰ বিষয়াসকলে খেতি কৰাৰ পদ্ধতিৰ লগতে চৰকাৰৰ পৰা সুবিধা পাবলগীয়া আঁচনিসমূহৰ ব্যাখ্যা আগবঢ়ায় ৷
পি এম কিষাণ, কিষাণ ক্ৰেডিত কাৰ্ড, কৃষি বিমা আদি সন্দৰ্ভত ৰাইজক অৱগত কৰে কৃষি বিভাগৰ বিষয়াসকলে ৷ সমান্তৰালভাৱে কৃষি বিষয়াসকলে খেতিয়কসকলে পাবলগীয়া সুবিধাসমূহৰ বিষয়েও বহলভাৱে ব্যাখ্যা আগবঢ়ায় ৷
তদুপৰি মীন পালনৰ সন্দৰ্ভত মীনবিভাগৰ বিষয়াসকলেও মাছ পালৰ সন্দৰ্ভত ৰাইজক প্ৰশিক্ষণ প্ৰদান কৰে ৷ আজি কাৰ্য্যসূচীত সফলভাৱে ৰূপায়ণৰ সহায় কৰে বৈঠালাংছ' কৃষিবিভাগৰ অভিযন্তা কেন্দ্ৰচিং থাউচেনে ।
প্ৰশিক্ষণৰ কাৰ্যসূচীত উপস্থিত থাকি কৃষকসকল উপকৃত হোৱাকৈ মূল্যবান পৰামৰ্শ আগবঢ়ায় পশ্চিম কাৰ্বি আংলংঙৰ হামৰেণ কৃষি বিভাগৰ বিষয়া বিশ্বজিত ৰংপীয়ে ৷ ডিফু কৃষি বিভাগৰ কাৰ্যবাহী অভিযন্তা হিৰেন বৰোৰ লগতে হামৰেণৰ জ্যেষ্ঠ কৃষি উন্নয়ন বিষয়া মন্টু শইকীয়া আৰু মীন বিভাগৰ বিষয়াসকল উপস্থিত থাকে ৷
সভাত শতাধিক খেতিয়কসকলে এদিনীয়া প্ৰশিক্ষণত উপস্থিত থাকে ৷ প্ৰশিক্ষণ দিয়াৰ পিছত সকলো উপস্থিত খেতিয়কক প্ৰমানপত্ৰৰ লগতে কৃষি বিভাগৰ সা-সৰঞ্জামসমূহ প্ৰদান কৰে বিভাগৰ তৰফৰ পৰা ৷