![বকলীয়াঘাটত আম আদমি পাৰ্টিৰ নৱনিৰ্বাচিত সভাপতিক আদৰণি আৰু যোগদান সভা](http://media.assettype.com/asomiyapratidin%2F2023-12%2Fa993b075-1f36-433e-b3e0-4d9fae6f45ff%2F458.jpg?w=480&auto=format%2Ccompress&fit=max)
ডিজিটেল সংবাদ,হাওৰাঘাট : কাৰ্বি আংলং জিলাৰ বকলীঘাটত বুধবাৰে আম আদমি পাৰ্টীৰ কাৰ্বি আংলং জিলা সমিতিৰ উদ্যোগত নৱনিৰ্বাচিত সভাপতিক আদৰণি আৰু যোগদান সভা অনুষ্ঠিত কৰা হয় । নোমল চন্দ্ৰ শইকীয়াৰ সভাপতিত্বত অনুষ্ঠিত সভাত আম আদমি পাৰ্টীৰ কাৰ্বি আংলং জিলাৰ নৱনিৰ্বাচিত সভাপতি জিতেন ৰংপিক দলীয়ভাৱে কাৰ্বি পহ'ৰে আদৰণি জনোৱা হয় ।
উক্ত সভাতে পূব কাৰ্বি আংলং জিলা, পশ্চিম কাৰ্বি আংলং জিলা আৰু ডিমাহাচাওৰ প্ৰভাৰী হিচাপে দায়িত্ব লাভ কৰা ফুদিং টেৰাং, আম আদমি পাৰ্টীৰ কাৰ্বি আংলং জিলাৰ সাধাৰণ সম্পাদক কাৰ্তিক বে' , ডিফু বিধানসভা সমষ্টিৰ সভাপতি ছাৰছিং টেৰণ, বোকাজান বিধানসভা সমষ্টিৰ সভাপতি চমাং টেৰণ আৰু হাওৰাঘাট বিধানসভা সমষ্টিৰ সভাপতি বাপুৰাম ৰংহাঙকো আদৰণি জনোৱা হয় ।
ইফালে সভাত বিভিন্ন অঞ্চলৰ পৰা অহা বিজেপি আৰু কংগ্ৰেছ দলৰ বহুকেইজন সদস্যই আম আদমি পাৰ্টীত আনুষ্ঠানিকভাৱে যোগদান কৰে । নতুনকৈ যোগদান কৰা আটাইকেইগৰাকীকে আপে আদৰণি জনাই আৰু সম্বৰ্ধনা জ্ঞাপন কৰে।