![ঘৰচীয়া জীৱ-জন্তুৰ লগত থাকি ভালপোৱা এটা গঁড়](http://media.assettype.com/asomiyapratidin%2F2024-01%2Fc0297e3e-fa5c-443e-bc9e-2d5c19b9e77e%2Fcdcc.jpg?w=480&auto=format%2Ccompress&fit=max)
ডিজিটেল সংবাদ, কাজিৰঙাঃ বনকৰ্মীয়ে যিমানেই খেদি নপঠিয়াওক কিয় যেনে তেনে সি আহিবই ৷গৰু ,ছাগলী,ঘৰচীয়া ম’হৰ লগত দিনটোত এবাৰ নচৰিলে যেন সি থাকিবই নোৱাৰা হ’ল ! আমি ক’ব বিচাৰিছো কাজিৰঙা ৰাষ্ট্ৰীয় উদ্যানৰ কহঁৰা বনাঞ্চলৰ দাঁতি কাষৰীয়া ম’হপাৰা গাঁৱত প্ৰায় প্ৰতি দিনে বিচৰণ কৰিবলৈ অহা গঁড়টোৰ কথা ৷
নিশাৰ ভাগত ৰাষ্ট্ৰীয় উদ্যানৰ গঁড়,হাতী,বনৰীয়া ম’হ আদি কাষৰীয়া জনাঞ্চললৈ ওলাই অহাটো নিত্যনৈমিত্তিক কথা ৷ অৱশ্যে পোহৰ হোৱাৰ আগেয়ে সিহঁত পুনৰ সোমাইগৈ ৰাষ্ট্ৰীয় উদ্যানৰ ভিতৰত ৷ পাছে এই গঁড়টোৰ পৰাহে বিপাঙত পৰিব লগীয়া হৈছে বনকৰ্মী ৷ আগদিনা খেদি দিলেও পাছদিনা পুনৰ উপস্থিত হয় জনাঞ্চলত ৷
আজিলৈকে কোনো ক্ষয়ক্ষতি নকৰা গঁড়টো আপোনমনে ঘৰচীয়া জীৱ-জন্তুৰ মাজত চৰি থকা দৃশ্য নিশ্চয় মনোমোহা ৷ কিন্তু গঁড়টোৰ লগতে মানুহৰ নিৰাপত্তাৰ বাবে গঁড়টো ৰাষ্ট্ৰীয় উদ্যানৰ ভিতৰলৈ খেদি পথিয়াবলৈ বাধ্য বনকৰ্মী ৷ কাৰণ স্থানীয় লোকৰ লগতে পৰ্যটকৰো আহ-যাহ চলে অঞ্চলটোত ৷ মন কৰিব লগিয়া যে বন্য জন্তুৰ চালচলনত অভিজ্ঞ স্থানীয় লোকে উত্তেজনা সৃষ্টি কৰা পৰিবৰ্তে সদায় সহযোগ আগবঢ়াই আহিছে বনকৰ্মীক।