![বাল্টি-কলহ বজাই প্ৰতিবাদ কাজিৰঙাৰ পিলখানাৰ একাংশ মহিলাৰ](http://media.assettype.com/asomiyapratidin%2F2024-01%2F9cc3a14a-ab98-476d-ae7d-d724526af682%2Fjazi.jpg?w=480&auto=format%2Ccompress&fit=max)
ডিজিটেল সংবাদ, কাজিৰঙাঃ আমাক পানী লাগিবই - দীৰ্ঘ দিন ধৰি পানী যোগান বন্ধ হৈ থকাত বাল্টি কলহ বজাই প্ৰতিবাদ কাজিৰঙাৰ পিলখানাৰ একাংশ মহিলাৰ ৷ মহিলা সকলৰ অভিযোগ প্ৰায় ১২ দিন ধৰি এলেকাটোত বন্ধ হৈ আছে পানী যোগান ৷
জনস্বাস্থ্য কাৰিকৰী বিভাগৰ অন্তৰ্গত কহঁৰা পানী যোগান প্ৰকল্পটো বিকল হৈ পৰাৰ বাবে বন্ধ হৈ পৰে পানী যোগান ৷ ৰাইজৰ অভিযোগ পশ্চিম কাজিৰঙা গাঁও পঞ্চায়তৰ যোগেদি বোকাখাতৰ জনস্বাস্থ্য কাৰিকৰী বিভাগক এই বিষয়ে অবগত কৰাৰ পাছতো মেৰামতিৰ ব্যৱস্থা ন’ললে বিভাগটোয়ে ৷
যাৰ ফলত বিহুৰ সময়ত এটুপি বিশুদ্ধ খোৱা পানীৰ বাবে হাহাকাৰ কৰিব লগীয়া হৈছে স্থানীয় ৰাইজ ৷ তাৰপাছতো কাণসাৰ নাই সংশ্লিষ্ট বিভাগটোৰ ৷ উপায়হীন লোক সকলে খোৱা ধোৱা সকলো কামতে ব্যৱহাৰ কৰিব লগিয়া হৈছে নদীৰ প্ৰদূষিত পানী ৷ এনে পৰিস্থিতিত চৰকাৰৰ প্ৰতি সকলোৰে দাবী অতি সোনকালে চৰকাৰে পানী যোগান ব্যৱস্থা নিয়মীয়া কৰি ৰাইজক বিপদ মুক্ত কৰক ৷