দেশ বিৰোধী চক্ৰৰ বিৰুদ্ধে সদায় কঠোৰ ৰাজ্য চৰকাৰঃ মন্ত্ৰী পীযুষ হাজৰীকা

ডিজিটেল সংবাদ,জাগীৰোডঃ শেহতীয়াকৈ ৰাজ্যত দেশ বিৰোধী কাৰ্যত লিপ্ত থকা কেইবাজনো লোক কেন্দ্ৰীয় অনুসন্ধানকাৰী সংস্থাৰ তথ্যৰ ভিত্তিত নগাঁও আৰক্ষী গ্ৰেপ্তাৰ কৰা কাৰ্যত গুৰুত্বপূৰ্ণ মন্তব্য আগবঢ়াইছে মন্ত্ৰী পীযুষ হাজৰীকাই। দেশবিৰোধী তথা বিদেশী এজেণ্ট ভাৰতবৰ্ষত বহুতো আছে।

পাকিস্তানী এজেণ্ট আৰু ভাৰত বিৰোধী কাৰ্যকলাপত লিপ্ত থকা বহুতো লোক অসমৰ ধিং, মৈৰাবাৰী, বৰপেটা, ধুবুৰীত এতিয়াও আছে। ৰাজ্য চৰকাৰ এই বিষয়ত প্ৰত্যেক দিনাই সতৰ্ক হৈ আছে। যিসকলে ভাৰতবৰ্ষত থাকি পাকিস্তান তথা ভাৰত বিৰোধী কাম কৰে তেওঁলোকৰ বিৰুদ্ধে কঠোৰ ব্যৱস্থা লোৱাৰ কথা প্ৰকাশ কৰে মন্ত্ৰী পীযুষ হাজৰীকাই।

তেনেলোকক নিচিহ্ন কৰিবলৈ কঠোৰৰ পৰা কঠোৰতম ব্যৱস্থা গ্ৰহণ কৰিবলৈ অভিযান তীব্ৰতৰ কৰা হ’ব বুলি প্ৰকাশ কৰে মন্ত্ৰীগৰাকীয়ে। বুধবাৰে জাগীৰোড সমষ্টিৰ অন্তৰ্গত মায়াঙৰ ১ নং মূৰকটা আৰু কাছশিলা অঞ্চলত ব্ৰহ্মপুত্ৰ নদীয়ে সৃষ্টি কৰা খহনীয়া প্ৰতিৰোধ কৰাৰ বাবে জলসম্পদ বিভাগে লোৱা কাৰ্যপন্থা পুনৰবাৰ পৰিদৰ্শন কৰে বিভাগীয় মন্ত্ৰী পীযুষ হাজৰিকাই। উক্তস্থান পৰিদৰ্শন কৰি নিৰ্মাণৰ অগ্ৰগতিৰ বুজ লয় মন্ত্ৰী হাজৰীকাই।

এই বান্ধৰ নিৰ্মাণ অহা ৩ মাহৰ ভিতৰত সঠিকভাৱে সম্পূৰ্ণ কৰিবলৈ জলসম্পদ বিভাগ আৰু ঠিকাদাৰক কঠোৰ নিৰ্দেশ মন্ত্ৰীগৰাকীৰ। পৰিদৰ্শন কালত তেওঁ মন্তব্য কৰে যে, "ঠিকাদাৰ মোৰ বন্ধুও নহয় শত্ৰুও নহয়। তেখেতলোকে নিৰ্ধাৰিত তিনিমাহৰ ভিতৰত কাম সম্পূৰ্ণ কৰিব লাগিব। অন্যথা তেওঁলোকৰ ওপৰত বিহিত ব্যৱস্থা ল’ব চৰকাৰে।" সংবাদ মাধ্যমযোগে ঠিকাদাৰসকলক এনেদৰে সতৰ্ক কৰি দিয়ে বিভাগীয় মন্ত্ৰী পীযুষ হাজৰীকাই।

Also Read: বিশ্বৰ ভিন্ন প্ৰান্তৰ ২৫০ গৰাকী মহিলাৰ মাজত জিলিকিল এগৰাকী অসমীয়া